Baro A Bannuar [Kenka Overseas Workers]

ni Rudy Ram. Rumbaoa



Gapu't rigat ti agdama a kasasaad
Pamiliam dimo kayat nga agkaradap,
Nagabrodka tapno maitag-ay ti biag
Awan pagpiliam ngem kasta la't gasat.

Iti lugar ken disso a papanam
Adda latta ila iti pamilia a pinanawam,
Ngem masapul ti anus ken sakripisio
Tapno iti panagsublim, balligi ti awitmo.

Iti trabahom, ipakitam siglat ni Filipino
Tapno dagiti pagserbiam kenka naamo,
Ta uray ammom ti agdama a kasasaadmo
Dika la ket agsakit, nasayaat ti salun-atmo.

Wen, sika, dakayo't baro a bannuar ti pagilian
Mateggedanyo adu't kaipapanan iti pamiliam,
OFW isangpetyo't doliar tapno masuplian
Ken balor ti piso itag-ayna ti pagsayaatan.

Wen, sika, dakayo't baro a bannuar ti pagilian
Dakayo't duri a mangyeg napintas a masakbayan,
Wen, sika, dakayo ken isuda agraman pamiliam
Dakayo't baro a bannuar a rumbeng a magungunaan.

Iti panagsublim iti lugar a nakayanakam
Awitmo't balligim isangpetmo iti pamiliam,
Tapno arapaapmo ditoy nga inka marugian
Bangonem pakasaritaam kas bannuar ti pagilian!

[copyright/iluko.com.September.2006.by.rudyram.rumbaoa]