Ni Rudy Ram. Rumbaoa
Ayna, Apo,
ngumato ken pumababa
agdama a bestida't babbalasang,
dillawek koma
ngem anian magustoak man...
Ti balasang no agaruat
iti mini-skirts wenno half-pants,
ti pagkitkitaak, sika,
kasla luppo amin a bakrang!
Ayna, Apo,
luppo a nakuttong
nagpaiduma't kinakuyas,
dimo koma ibisbisto
nangruna no piniglat;
riknak ti madismaya
awan ngatan pulos ti ganas,
ti essem ken gagar
ay, ania ketdin a malas!
'Tay nalasang no isu't agaruat
iti mini-skirts wenno half-pants,
ti pagkitkitaak, sika,
luppo a nasarangsang nga adu't kersang!
Ayna, Apo,
luppo a nalapsat
langana't pimmuduna,
uray no agmalmalem
gayyem, diak kauma
a matmatmatan ti rugso ni essem
riknak sumanikar ken mabang-aran;
ay wen, umanay nga ul-ulsam,
no sikan 'tay agmaymaysan!
Ti 'yanna a pagdaksan
wen pare, siak 'tay nauman,
luppo ken gurong
iti agduduma a babbalasang;
diak sa pay ketdi malagipen
iti agsimpa ken mangasawan,
kimmigpal a malas
siak san 'tay malakayan!
[copyright.2006.by.rudyram.rumbaoa]
*poem published in iluko.com
___________________________________
"Dumngeg kadagiti makaabbukay a kanta ti iloko a naputar ken nagaun iti kalikagum ti puso. Dagitoy ti naitalimeng iti kaunggan tapno maikkan anges ti sonata ti kalman ken maibinggas iti agdama a mamalukay iti irteng ti rikna. No maminsan, pitingenna ti kaunggan ket lukaisanna ti linabag ti kalman nangruna no mainaig ken ni Ayat. Agbalin met a nota ti tunggal anges ket sika a mismo ti mangtempla ti kuerdas ni Ayat iti kayatmo nga ayug tapno rummuar ti napimpintas a himno ken rima ti biag..."
Samiweng. Daniw. Sarita. Salaysay. Damdamag, Kdpy.
No comments:
Post a Comment