Addaakon

Addaakon dinak napakadaan
Addakat' ruar dinak napasungadan,
Gagayyem isudat' pakakumikomam
Iti panagsublik innak insaganaan.

Napait man inyeg kaniak ti kalman
Iti kaaddak dinak payen mapuotan,
Naindagaan a banag pakariribukam
Saan a manglapped pakalawlawagan.

Kunak idi agsubliak iti dennam
Tapno malinteg biddut a naaramidam,
Intedkot' tiempo tapno adda pagbaliwam
Saanka nakasagana kinayatmot' pagayatam.

Ita addaakon addaka nga agkatangkatang
Rumbeng maikeddengen umisu a pannusam,
Kunak idi no agsubliak dimonto mapakadaan
Kas iti mannanakaw dimo ammo't oras
A yuumayna  panagsamsam.

Ipukkawko pay addaakon, dimo ida mapanawan
Bisio a nangrakrak ken nangbaluden kararuam;
Dimtengen oras tapno sika agtakder iti sangnguanan
Dagiti aramidmo isudat' pagbatayan no adda nakabasolam.

Wen, addaakon, ngem piman ta dinak napakadaan
Kasano ngamin ket nagipapasam ragsak a paggartemam,
Ta kunak, uray agyanka dita ruar a mangpasungad kaniak
No dika agridam malibasanka umay kenka ti peggad.


ADDAAKON
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com