ni Rudy Ram. Rumbaoa
Iti panagmaymaysak, adda iliw
No sumiplot ladawam iti panunotko
Agdanapeg ti barukongko
Tunggal malagipko ti aldaw
A panagam-ammota
Ngem, immadayoka sa nagpukaw
Kas angep iti Haleakala.
Saludsodek man kenka:
Daytoy kadi ket iliwko
Wenno gapu laeng ta malagipka?
Kunak kenka: sapsapulenka,
Diak maupay ta mariknak ti kaaddam
Ditoy sibay nupay maukrit ti saem
Ket mapespes dagiti batonlagip
Iti panakaulilak kenka.
No namin-ano a dinung-awak ti yaadayom
Tapno maitanemka iti lagipko
Ngem agparang laeng ti alintataom
A mangipalagip iti naikeddengen a nalpas.
Wen, yarigkot' bagik kas iti panaglaylay
Ti sabong nga 'Ahinahina iti inna panagibtur
Nga agmaymaysa iti tuktok ti Haleakala,
Ibturak ti linnaaw a kumiddit iti kaunggak
A kas tanda ti limmamiisen nga ayat.
Dika pabasolen iti nagbanaganta
Ta adda met karbengam
A mangsapul iti bukod a ragsak
Iggem dagiti dakulap ti taluntonem a gasat,
Ngem palubosannak kad pay
Nga agsapul iti sabali nga imnas?
Laglagipem: sadino man ti ayanmo
Kanayon nga addakat' isipko-
Awitko ti pateg ti ayatmo.
Ngem bareng kunak ti ayat a nagpukaw
Agsublinto a kas angep iti Haleakala
Ket iti isisingising ti init iyegna't lawag
Tapno in-inut nga aglunit ti sugat
A kas iti irurukbos manen ti sabong nga "Ahinahina
Iti panangdayas kenkuana ti kaipasngay nga init.
[c]september27'2007byrudyram.rumbaoa
________________________________________
