ni Rudy Ram. Rumbaoa
kunada a naimas
tay bassit ket naganas,
aglalon no mabasa
aggalisgalis, agkatayka!
no isubom mananammo
ayna apo, sapsapulemto,
no dimo ramanan ita
amangan no agbabawika!
tay dakkel awan dumana
iti bassit agpadpada,
ngem sabali't ganasna
tay dakkel no maramanam, kaka!
ay wen, nagalgalis no agbabasa
tay bunga't okra no mapakbet, sika,
naim-imas pay koma, parabawam ti aramang
samo laukan bunga't paria, kamatis ken bawang!
ay wen, nagalgalis no agbabasa
tay bunga't okra no mapakbet, sika,
nagalgalis pay ngata, bulong saluyot iparabawmo
samonto laukan ti laya ken tsitsaron a mangpabanglo!
wen, kunada a naimas
dakkel, bassit a naganas,
ngem kunada nga awan dumana
no maraman 'toy nga agpadpada!
daytoyen ti imasna, sika,
no maramanam, agsapsapulka,
ta naramraman tay agbabasa
ken nagalis nga awan sardayna!
[copyright September 2006 by rudyram.rumbaoa]
