ni Rudy Ram. Rumbaoa
[Malapdak kadi ti riknak
nga agkan ti mawaw a bibig
nupay pinagay-ayam dagiti karit
ti pannubok a nagkallautang
ken agkurno iti labus nga arapaap?]
Ar-arapaapek ketdi daydi nabara
a kas iti gumilgillayab nga apuy
nga arakup ken ti nasam-it nga agekmo
iti kaaddam iti sidongko.
Wen, daydi apagdarikmat a kanito
a naglemmesan ken inappupo ti diro ni ayat
iti naulimek a rabii ken salinong ti sellag a bulan.
Bukodta ti lubong kadaydi a rabii
ket awan makatubeng iti panagilad
ti lamolamo a bagi tapno agmaymaysa
a mangnanam ti apagbiit a ragsak,
ngem kasla insiwet ti napasamak
ta agpadata a napnek ken kamkamaten
ti agpugsa-pugsat nga anges.
Ngem nalpasen daydi ket awankan iti sidongko
ta uray kasano aya ti ayatta a manggusto
ken mangtaginayon ti amin,
addanto latta panakawaw dagiti bibig.
Saan gayam amin a ragsak ket itdenna ti kinaagnanayon-
adda patinggana tapno sangnguen ti kinapudno,
dagiti pannubok ti biag iyanninawna met ti masakbayan
ket iti kamaudianan, agkurno iti agkallautang nga arapaap.
Ita ti panakalagip ti maika sangapulo a tawen nga anibersario
daydi nakaal-alingget nga ipupusaymo, no mabalin,
diak koman kayat a lagipen ngem diak malapdan
ti durog ti napalabas; agnanayonda ketdi iti isipko.
Kunak: diak malapdan nga agkan nupay nalamiisen dagiti bibig
akuek, ta uray kasano't panangliklik dagiti umay a karit,
pasetdanto latta ti pannubok iti agkallautang
ken saanen a magun-od nga arapaap.
[copyright 2007 by rudy ram. rumbaoa]
________________________________
