ni Rudy Ram. Rumbaoa
(naipablaak iti Bannawag idi Abril 19, 2004)
Idi saludsodem kaniak, Sofia Monique
No adda lawag iti likudan ti nasipnget a langit
A nangbalud iti naganus a panunotmo.
Wen, burburtia kadi dagiti tuok
A nangules kenka iti nakiro a panagbiag?
Kunak ita: adda sungbat, Sofia Monique, iti tunggal saludsod
Nupay manakanak luluam, diak ida matarusan
No maminsan, sutil ni Gasat ta ipalubosna
A sumirip ni Patay, umay makiinnangaw.
Ngem saan, aya, a nasaysayaat no sika ti mangduktal
Tapno masungbatan agdama a nagbanagam?
Idi umar-arubayan kenka ni Patay
Pinalubosak kadi nga umaynaka rabsuten?
Bay-ak kadi manen, Sofia Monique
A mapukawmo dagiti arapaapmo?
Bay-am ketdi a maitanem ti napalabas
Tapno magun-odmo ti ragsak ti masakbayan...
Wen, adda lawag, Sofia Monique
Iti likudan ti nasipnget a langit
Uray sinallukobannaka tapno mabulsekka
Patiek, adda latta gagarmo a masirayan manen
Ti lawag nga umay mangilala kenka
Tapno ruk-atam ti nabayagen a panagduadua.
copyright 2006 by rudyram.rumbaoa
_________________________________
