Bay-annak Nga Aglailo
ni Rudy Ram. Rumbaoa
Monica...
sikat' ragsak 'toy biag
sikat' liwliwa ken kaibatogak,
sikat' ramen tagtaga-impek
no siakon ti mairidep;
Sika ken ti arapaapta...
silawka ti masakbayak
tapno idalannak iti pagnaak,
inyegmot' napudno nga ayat
samiwengka iti karakuak;
Itan addaka't dennak...
bay-annak nga aglailo
riknaem, ala, ti arakupko
a kas apuy nga agbara ti rugso
ta karaman amin daytoy ti karayo;
Sika ken ni Sofia...
kas iti kaipasngay nga agsapa
inyegyo ti baro a namnama,
iti pamilia- ni Sofia ti bannuar
iti sipnget- isut' anaraar;
Siak, Sika ken Sofia...
awan inggana 'toy ragragsak
itan ta addakayon ditoy arpad,
uray mapukawakton ditoy lubong
malaglagipdakto nga agnanayon!
[copyright.may.2007.by.rudyram.rumbaoa]
_______________________________________
