Ni Rudy Ram. Rumbaoa
Adda lemma
di naulilam a kalman,
imbatim ti sugat
iti agpitpitik nga ayat
nupay nalpasen daytoy
a dinung-awak.
Nabayagen
a naitanemka iti lagipko,
ngem nasinga ket nagbiagka
iti isusulpotmo iti panunotko;
Simmamay iti kaunggak
daydi batonlagip a nabukel
ngem sabali't turongmo idi nasapulam
ti ragsak a kaibatogam.
Ita, anasaaska iti aglawlawko
mangegko dagidi balikasmo
kas iti kari a nabatad,
ngem kasano ngarud pay
a makasublika
no nalpasen a simminaka?
Addakanto latta a malaglagipko
ta pasetkan iti inulilam a kalmanko,
nupay naut-ot ti sugat;
Agpitikto latta 'toy pusok
gapu ken ni ayat.
Akuek, sabalin ti lubong nga ayanmo ita
ket dimon marikna ti apros ken agekko,
ngem addanto latta sadiay ti biag
ti ragsak ken ayat a kalikagumam!
*[Fil-Am Observer, March 2008 Issue]
____________________________________
