Rudy Ram. Rumbaoa
Ipalagipko manen kenka, Cecil,
a sika't sungbat dagiti ar-arapaapko;
ta babaen kenka, naragpatko ti balligi
nasagrapko dagiti di agressat a ragsak
manipud iti napudno a pammategmo ken ayat.
Sika ti ina dagiti annakko ket babaen kadakuada,
makitak ita ti kinataok ken kaipapanak.
Agyamanak uray adu dagiti pannubok a naglasatan,
nagtalinaedka a napudno iti sidong ken kalikagum.
Wen, Cecil, arigmo ti kuerdas ti maysa a gitara
a sika't pakatemplaan ti umisu nga ayug 'toy kararuak.
Ti kalman, nagbalinda a pakasaritaak ita--
ngem inton bigat, ti bunga ni ayan-ayatta isuda
ti agbalin a sungbat ti kalman ken ita: isuda ti masakbayan.
Adda kadi pay sapulek kadagitoy nga ipapaaymo kaniak?
Awanen ti kas kenka--
nagbalinka a ramen ti kalmanko a nangpasantak
ti karadkadko ita uray pay mariknak nga agsalugen ti salun-at.
Ta adda kadi pagdumaan ti kalman ken ita
no maymaysa laeng ti agikut iti puso?
Manen, iparipiripko kenka a bukodmo 'toy ayat;
sika awanen sabali a kaikariak.
Nalpasen ti kalman
ngem ti panakaipasngay iti sabali a bigat,
maukkon dagiti baro a namnama
tapno isuda't pagbatayan ti masakbayak.
[copyright (c) november 22, 2007 by rudy ram. rumbaoa]
[*blog- cres]
_____________________________________________
