Pasantakem arapaap
A pagarupem dimo pay naragpat;
Ita ti aldaw dagiti amin nga aldaw
Palubosam liday, sarabuem ray-aw.
Malagipka, kaano laeng daydi
Dayag naipangruna, mangnibinibi;
Kunam nasapulamon agikut iti pusom
Dika agang-angaw uray agdanapeg barukong?
Pudno tinagibim pannakigasanggasat
Danapeg a naparnuay inka nalasat,
Nagballigika tunggal aldaw a naglabas
Nagtalekka a sikakaradkad iti pannubok ti biag.
Ita, no manon nga aldaw kalpasanna
Daydi pannakibalubal a manggun-od gungguna,
Pudno inlagam iti panunot ken kararuam
Panagtalek iti bagim; addan pagrang-ayan.
Agsubliak ta pagarupek a naragpatmot' arapaap
Dimo inkankano dagiti balikas a pangublag,
Ngem ketdi binay-am a matun-oyam
Tapno masirmatam napintas a panungpalan.
Wen, awitko ti sabong a sagut kenka
Ti maminribu a kaipapanam,
Ti panagsabat manen ti dalanta
Tapno agayamuom ti masakbayan...
MALAGIPKA, AGSUBLIAK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[copyright5.2.08byrudyram.rumbaoa]
