NI Rudy Ram. Rumbaoa
Binigat nga inna sarungkaran
kaingungotna iti pagtaraknan
balonna't taraon a pagsangnguan
agdanggayda a mangan iti lamisaan.
Agliman a tawen nga agsagsagaba
iti sakit ti panunot a panakalipat
nupay saanen a malasin ti asawana
kenkuana, agari ti pateg ken ayat.
Ammo ni Lakay Mindo nga umil-ilet ti lubongda
ta saanen a kas idi kabanbanuagan ti pigsana
kas met ken ni Baket Petra
in-inut metten nga agsalug ti salun-atna.
Para kenkuana, napateg ti panakakitana
iti kaingungotna nga awanen ti gawayna
nasakit man nga awaten ti kinapudno
panawen laeng ti makatubeng ken ni Lakay Mindo.
Iti tunggal kanito a panagpitik ti oras
kasla umir-irut ti galut saan a mawaswas
ti marikna a kinapateg iti kaadda iti sidongna
ken mamalukay iti nabayagen a panakaulila.
Mapneken ni Lakay Mindo a kasarsarita ti asawana
uray no di sungbatan ni Baket Petra- ta awan ti masaona
di pabasolen ti Lakay ti nagbalin a bunga
ta dina maiturayan ti nagbalin a gasat ni Baketna.
Italek laengen ti Lakay iti Dios Apo
no pumusayto ti Baketna isu't sumaruno
ta patienna nga addanto ragsak iti pagtungpalanda
sadiay langit ituloyda ti napugsat nga ayan-ayatda!
[copyright 2007 by rudy ram. rumbaoa]
_______________________________
