Ni Rudy Ram. Rumbaoa
Agkurno dagiti adalam no malabsam
Iti panagturongmot' entablado a pangibalikasam
Dagiti panursuro a maadaw iti libro ti biag
Tapno kadakuada maiburay ken mailawlawag.
Nabagas tunggal binatog inka isawang
Adda anag ken napnoan kaipapanan
Kayatmo a surotendaka't kaaduan
Iti bukodmo a pammati maysaka a pagulidanan.
Kunam a dagiti panursurom isu't dalan
Tapno matagikua ti pagarian a nailatang
Ngem in-inut a nagikay dagiti adalam
Gaput' aramid nga inka nakailaw-anan.
Ita, di ammon dagiti adalam iti turongenda
Ta nabuakda a kasla karnero a naiwawa
Didan mabirokan ti pastor a mangidalan kadakuada
Ngamin intarayan ken binaybay-anna ida.
Iti kamaudianna nasarakanda ti pudno a dalan
A maisupadi iti panursuro ti pastor nga inda nagkurnoan
Maabisigda ita a dakkel a biddut ti inda nakaikalakangan
Dinanogda't barukongda gapu't basol a pagbabaywan.
Mamatidan a maymaysa't dalan a pagnaan
Isuna laeng nga adu't pannubok ken tubeng a pakaidalebam
Agessem iti kinadakes wenno agturong iti pagsayaatan
Iti ungto ti dalan, sadiayto ti inkay pagdadanonan...
[CO.2008.by.rudyram.rumbaoa]
_________________________
