Sika't Pigsak, ti Pagbiagak

ni Rudy Ram. Rumbaoa



Kaarigko't pitak
Naigamer iti babak,
Iti basol a namulagatak
Iti lunod a nagtaudak.
Ngem,
Agbabawiak
No rebbengna nga agpakawanak
Iti biddut a naaramidak,
Gaputa Sika ti Apo--
Ti pagbiagak.

Nawaw ken nabisinanak
Impaaymo't biag
A taraon 'toy kararuak;
Napnekak
Ta linemmesnak iti ayat.

Bulsekak
Linuktam ti matak.
Nayaw-awanak,
Kinibinnak.
Naidalebak,
Sinakroynak.
Nasugatak,
Inagasannak.
Natnagak,
Sinippawnak--

Kenka, O Apo,
Sika ti pigsak
Ti Pagbiagak!

[CR///nov.30.08///by.rudy.rumbaoa]
_______________________________

Lipatek [Ken ni Ahinahina]

ni Rudy Ram. Rumbaoa


Lipatek ti naglabas a kalman
Tapno maagasan ti sugat,
Apges iti pusok a mariknak
Nagpasarak iti manglimlimo nga ayat.

Ngem,
Narigat sa man a mapukaw
Nabiag latta ti piglat-- di maungaw;
Ta uray lipatenka ti kunak
Agari't lagipmo iti kaunggak.

Wen,
Lipatek koman
Ti linabag ti napait a kalman;
Patiek,
Adda baro a namnama nga inna isangbay
Iti mainaw nga arapaap a nadarisay.

Lipatek, wen lipatek daytoy a tuok
Tapno malasatak 'toy a panakasuot;
Ta ti isisinam iti panunotko bag-utenna
Ti siit a naipalay mairamanda a pumusay.

[Ngem apay a tinalikudannak--
Gapu kadi iti diak irurusing iti arapaapmo
A nabayag idin a ninamnamam?]

Ala,
Lipatennak ngem dika lipatan;
Patiek nga adu pay ti nabati nga inta panagsarang--
Ulitek: diak kayat ti sumina ta ti isisina
Kaaspingna ti sinamar a linangeben
Ti angep ken ti napuskol nga ulep
Iti tangatang ti agkatangkatang nga arapaap...

[CR//nov.30.08///by.rudy.ram.rumbaoa]
________________________________