ni Rudy Ram. Rumbaoa
Umil-ilet ti lubong a pagpusiposanda
mabilbilang payen ti oras ken tiempoda
kasta't kabibiag dagitoy nga agasawa
agbibiagda ngem saandan a tengngel ti garawda.
Kanayon a binigat nga inna sarungkaran
kaingungotna iti pagtaraknan arigna a pagbaludan
saanna a lipatan balonna't taraon a pagsangnguan
agdanggayda a mangan iti lamisaan isuda't masiputan.
Aginnemen a tawen nga agsagsagaba
ni baketna iti sakit a panakalipat
nupay saanen a malasin ti asawana
kenkuana, adda pategna ken ayat.
Ammo ni Lakay Mindo nga umil-ilet ti lubongna
ta saanen a kas idi kabanbanuaganna ti pigsa,
ta kas met iti kaingungotna, ni Baket Petra;
in-inut metten nga agsalug ti salun-atna
Ngem para iti lakay, napateg ti panakakita
iti kaingungotna a nalapsuten ti gawayna;
nasakit man nga awaten daytoy a kinapudno
ti kumpay ni patay agur-uray ken ni Lakay Mindo.
Iti tunggal panagpitik ti pagorasan
nagari iti barukongna ti napudno nga ayat,
asi iti kaunggan ti tunggal kaadda iti sidongna
a mamalukay iti nabayagen a panakaulila ken baketna.
Mapneken ni Lakay Mindo a kasarsarita ti asawana
uray no di sungbatan ni Baket Petra- ta awan ti masaona,
di mababalaw ni Lakay Mindo ti nagbalin a bunga
ta dina maiturayan ti nagbalin a gasat ni baketna.
Nagkidem ken nagtanamitim ti lakay iti Dios Apo
iti mabiit, pumusay ni baketna isunto ti sumaruno;
ngem patienna nga addanto ragsak iti pagtungpalanda
sadiay langit ituloyda ti napugsat nga ayan-ayatda.
Pudno, insuko ni baketna ti maudi nga angesna
inem-em-eman ti lakay ti ladingit ta awan ti mabalinna;
inawatna a sipupuso natanang iti panunot ti imbulosna
ta iti di mabayag, isu't sumaruno ket masapul nga agsagana.
Kalpasan iti makabulan, nagkupit barukong ni Lakay Mindo
ammona a daytan ti oras ken tiempo, malagip ti Apo;
nagkutukot dagiti tumengna, immababa ti panagangesna
nagtalek iti Namarsua, inkidemna dagiti nalanay a matana.
[CR///12.04.08///by.rudy.ram.rumbaoa]
_______________________________
