Palubosam Nga Agtaeng Ti Apo

ni Rudy Ram. Rumbaoa


Ayat
iti pamilia,
gagayyem
ken
am-ammo.

Ragsak,
rag-o,
tiempo ti amin
a tiempo,
panagdedenna
panangiwaksi
ti gurang-gura.

Ne, taliawem.
Wen taliawem met,
dagiti mabibbibi
maikuskuspil, mailanglangi
wenno nailaksid gaputa
awan ti mabalinna iti biag;
bukkaam, pagaruyotem
pespesem nga ipaay
ti kaasi,
ti pammategmo
nga agaun iti puso.

Adda santa
miselto: paskua;
agkanta iti ayug
ti pagdayaw ken pagrukbab
iti panakaipasngay
ti Mannubot
itan-ok ti naganna,
agrag-o!

Agpakumbaba
agtalek, kararag:
mamati.
makitunos, makibagay
talna: silmutan ti kappia--

Ita a Paskua...
iti puso,
palubosam nga agtaeng ti Apo!


[CR///12.21.08///by.rudy.ram.rumbaoa]
_______________________________

Rikna

ni Rudy Ram. Rumbaoa



makaay-ayo
ti naumbi
ti nalanay
nga apros.

ket agburayok
ti tarigagay
iti masmanaayan a puso:
matignay.

idennep-iliw
pislen
agsang-aw a bara
a kas apuy
ti segga nga agaun
iti kaunggan.

agbusel a kas sabong
ti lumtog a rikna
iti pataudenna a ragsak;
ti karinio ti bibig,
yegna't sam-it-agek
balikas: ayat.

[CR///12.21.08///by.rudy.ram.rumbaoa]
______________________________