Dinak Sangitan, 2

Ni Rudy Ram. Rumbaoa



Sika ti nanggulib
'Toy nadarisay nga ayat,
Ta no saan a kinibkiban
Ti kinarasim iti gartem--
Dinak koma sangitan
Ta dika dung-awan.

Ngem saan nga isu't paggibusan
Iti ayat nga inka sangitan,
Ta iti ipupusay ti lagipmo
Agpatak iti panunot
Iti pusok
Iti rikna...
Agsublinto a maipasngay.

Diak ketdi idawat a pumusayka
Kadagiti arapaap ta karamanka
A nailaga iti biag nga iti naminsan,
Pinaragsakmo't lubongko iti apagapaman.

Pasetka met iti minulik nga arapaap,
Ngem sika't nangkeltay; namagngudo
Ti pulso a mamagpitik iti ayat.

Ti isisinam kaniak,
'Maykanto kantaan
Iti kansion a pagragsakam.
Diak gamden a tokaren ti naleddaang
Ketdi kantaek iti mangray-aw 'ta kaunggam.

Kunak, dinak sangitan
Tapno dika met dung-awan;
Ta saan nga agnanayon a makipagrikna
Ti liday, adda ketdi bang-ar a yegna
Tapno malapsut ti naitanem a gura:
Yeg met iti isisinam ti baro a namnama.

[CR//11.27.08//by.rudy.ram.rumbaoa]
______________________________