Kunak No Sika Pay La Ti Dati

Ni Rudy Ram. Rumbaoa



Sika latta daydi napusaksak a sabong
Iti pusok nga ingget banglo-agadiwara,
Sika pay la daydi mutia
Nga impateg ken inayat 'toy pusok.

Sika latta daydi Sika
A biag dagiti arapaap,
Sika ti daniw a putar
Naitalimeng iti barukong;
Kunak no di mapunas
Ti uray maysa a naibinggas
A balikas- kari nga insapatam.

Ngem nagbiddutak.
Namaliwen ti maris daydi pusaksak;
Kunak no sika pay la ti dati--
Ti biag nga angesko
Ti ayat a ragsakko
Ken pakatungpalan ti arapaapko.

Ngem kunak,
Adu ti burburtia
Iti biag a daliasatentayo.
Patiek, maysaak kadakuada ti pakaburiboram;
Ngem saan kadi a paset ti pannubok dagitoy a tuok?

Simmiyasikan, sikan ti timon
Ti dana. ti desdes a sinurotam.
Dika pawilan iti nagayatam.

Laglagipem: agingga a di aglunit
Ti sugat a nakasaktan 'toy pusok,
Silalagipak latta kenka iti agnanayon--
A sika, nagbalin a panes ti napalabasko.
________________________________________