Juliana

Ni Rudy Ram. Rumbaoa



Nalidem ti tangatang 'di tumangadak
Nalamiis a pul-oy ti angin ti mariknak
Pagammuam ta nagtupak ti bayakabak
Tudo a nagtennag iti rupak.
Ngem kellaat idi, Juliana, ti yaasidegmo
Indiayam a makilinongak iti payongmo,
Iti panagkuyogta , nakariknaak iti naisalumina
Banag nga impudnok, ngem immisemka.

Nagsardeng ti bayakabak
Isu metten ti yaadayom kaniak,
Kas iti bayakabak idi dumtengka't biagko
Iti panagsardengna isu metten iti ipapanawmo.

Ket ita, Juliana,
Malagipka manen
Payongmo a linongko innak sapsapulen
Basa ken lammin ti innakon sagrapen.

Sapsapulek di katawam a nalailo
Sika nga inayat ken inar-arapaapko,
Anian a nagsakit di maamuak a sika't pimmusay
Ti langit, agladingit ken agsangit pay...

[CR.2008.byrudyram.rumbaoa]
__________________________