Pagbiagak Ti Lubongmo

Ni Rudy Ram. Rumbaoa



Agpayso,
ditoy ti inkam paguummongan
pakatipontiponan
ka-Filipinoan wenno saan.

Gapu kenka,
nagbalinka a rangtay ti kaaduan.

Dagiti prosa, daniw, salaysay
sarita, nobela, ken dadduma pay
agraman dagiti kankanta, bukanegan
kasta met ti damdamag ken kabkablaawan;
dagitoy maikur-itda ken pakabasaan
tapno maliwliwa-maasa't kapanunotan
ken agbalin daytoy a tibkermi
iti sarikedkedmi ken panakamuli.

Dinto agkupas dagiti maitukit kenka
agnanayon ketdi nga ideppelmi ti pluma
ti bukel ti sirib a maimula
tapno lumawa ken agrampaya
iti panunotmi ti adal a masukdumi kenka.

Agyamanak
ta imbilangnak met a pagayam,
nanumo a gayyemmo
a nagtaud iti Kailokuan;
gapu iti Literatura Ilokana
ditoy ti inta nagam-ammuan
naruay nga am-ammo ken papagayam
a danonem iti amin a paset ti sangalubongan.

Wen, kas met iti rinibribu
ipeksak ti nalaus a yamanko;
Iluko.com iti sidongmo
pagbiagak ti lubongmo.

[CR.11.18.08//by/rudyram.rumbaoa]
_____________________________