Sulisog, 2

Ni Rudy Ram. Rumbaoa




Sutil latta dagiti garaw
ta yappanna ti sangkatukel a karinio,
sintirenna no umingar ti pus-ong
ti gagatel a sumuknor; ay, nasiludnakan!

Magustuanna't manggargari
pagay-ayamanna't kinalupoy ti panunot,
dagiti naasawaan wenno saan
ay, no dimo liklikan, sika't inna kaptan.

Manglimlimo met no maminsan
ta iladawanna't kinainosente, gayam sugsoganna't kaunggan,
in-inut nga ilemmesnaka iti gartem ti lasag;
iti limdo, agbabawikan ngem ania pay ti maaramidam?

Wen, sutil latta dagiti garaw
ta no dadduma umay kenka umapon lattan;
rakrakenna't urnos ti pamiliam
agingga a mapirsapirsay ti kapanunotam.

Ngem, kabaelam met ket a liklikan
sangkatukel a pannubok ti karinio,
dika paiturayan iti sulisog a mangdurog ta riknam
ti simrekam, isu met la ti pagruaram.

[CR//Nov.24.08//by.rudy.ram.rumbaoa]
__________________________________________