Diak Koman Lagipen

Ni Rudy Ram. Rumbaoa



Diak koman kayat a lukaisan
ti tugot ti napalabas a nakasugatan,
ngem apayaunayen aya ta agparang laeng
ladawam iti panunot a mangusig iti nakem.

Insapatak idin a diak koman lagipen
ta ipalagipna ti kinabareng-bareng,
iti kaunggak masinga ti sugat
gapuanan pananglipatmo 'toy ayat.

Kunak: anansata, tinagibassitmo
dagiti arapaap a binukel-sinangalko,
dinamili ti pammateg ken sakripisio
ngem piman siak man ti inka inkulbo.

Ngem dika mababalaw no simyasika
bukodmo ti timon, sika't makarikna,
uray ipilitko ti bagik dinak met la ipangag
gapu ta iti dayta a kanito, kukuam ti ragsak.

Agpayso, diak koman kayat a lagipen
ta ad-adda a mariknak ti ut-ot nga innak sagabaen,
ngem mapabasolmo kadi ti pusok nga agayat
iti kas kenka a nagbalinen a kasilpo ti darak?

Laglagipem: karamanka iti napalabasko
pasetka ti nagbalin nga arapaapko,
nupay ti kinapudnona, pinaglikudannak
bay-ak a kukuam ti ragsak, kukuak ti ayat.

[c]2007/byrudyram.rumbaoa
____________________________