Lipatek Koma

Ni Rudy Ram. Rumbaoa



Lipatek koma man
naglabas a kalman
tapno maagasan ti sugat
nagpasarak ken ni ayat,
ngem narigat sa man a mapukaw
sibibiag ti piglat di man maungaw
ta uray lipatenka ti kunak
ad-adda met nga agari't lagipmo iti kaunggak.

Wen, lipatek koma man,
ti linabag ti napait a kalman
ta saan amin a mapaay ket maupay
bay-ak ketdi nga agungar ti tarigagay
iti kaunggak maitalimeng ti kinadarisay.

No kunam a lipatek daytoy a tuok
wen aramidek tapno malasatak daytoy a panakasuot
ta adda pagsayaatan ti isisinam ket ugasanna
ti amin a naigamer kenka a panagduadua.
Ngem apay koma a talikudannak
gapu kadi iti diak irurusing
a nabayag a ninamnamam?

Lipatennak ngem dika lipatan
ta adu pay ti nabati nga inta panagsarang-
Ulitek: diak kayat ti sumina ta ti isisina
kaaspingna ti sinamar a linangeben
ti angep ken ti napuskol nga ulep
iti tangatang ti agkatangkatang nga arapaap.

[copyright 02, november 2007 by rudy ram. rumbaoa]
____________________________________________