Ni Rudy Ram. Rumbaoa
Nagpatnga iti entablado
Ti narapis a lakay nga agpabuya,
Iggemna ti tulbek ti masakbayan
Yawatna iti sumaruno nga agparang.
Nupay saan a kas iti dati ti ragsak
A naipinta iti rupa ti lakay a duogan,
Ta ammona a saanton nga agbayag
Iti tallaong ti entablado ti biag.
Nalaus ketdi ti panagyamanna
Iti isu amin a nangasibay kenkuana;
Iti uneg ti sangapulo ket dua a bulan
Nalpasen ti mision, orasna nadanonan.
Linagipna ti napalabas:
Dagiti karit ken panakasuot
Kalgaw ken allawig
Gubat ken kappia
Liday ken ragsak
Dina maiturayan dagitoy
Ta isu ti pilid ti biag
A ginusto ti tao a mapasamak
Iti lubong a nakaparsuaanda.
Sakbay nga iyawatna ti panawen
Inkararagna a sagrapen koma
Ti naimbag a gasat dagiti agbuya--
Iti isisingising ti baro nga agsapa.
Inwagis ti lakay dagiti dakulapna
Tanda ti maudi a parang ken panagpakada,
Iti entablado nagal-aludoy a bimmaba
Tapno sumaruno nga agpabuya ti maladaga...
[copyright.december31.2008
byrudy.ram.rumbaoa]
_______________________
