Awitko Ita ti Sabong
Ni Rudy Ram. Rumbaoa
[nasurat.5.2008.maui]
Pasantakem ti arapaap
A pagarupem a dimo pay naragpat,
Ita ti aldaw kadagiti amin nga aldaw
Ruk-atam ti liday ken sarabuem ti ray-aw.
Malagipka, kaano laeng daydi
Dayag a naipangruna, mangnibinibi;
Kunam a nasapulamon iti agikut ti pusom
Saanka nga agang-angaw uray agdanapeg ta barukong?
Pudno a tinagibim ti pannakigasanggasat
Daydi danapeg a naparnuay inka nalasat,
Nagballigika tunggal aldaw a naglabas
Nagtalekka a sikakaradkad iti pannubok ti biag.
Ita, no manon nga aldaw kalpasanna
Daydi naudi a pannakibalubal a manggun-od ti gungguna,
Pudno nga inlagam iti panunot ken kararuam
Ti panagtalekmo iti bagim; addan pagrang-ayan.
Agsubliak ta pagarupek a naragpatmot' arapaap
Dimo inkankano dagiti balikas a pangublag,
Ngem ketdi binay-am a matun-oyam
Tapno masirmatam ti napintas a panungpalan.
Wen, awitko ita ti sabong a sagut kenka
Ti maminribu a kaipapanam,
Ti panagsabat manen ti dalanta
Tapno agayamuom ti masakbayan...
[copyright5.2.08byrudyram.rumbaoa]
_________________________________
