Ni Rudy Ram. Rumbaoa
Kunak manen kenka, Magnolia,
A winaknitakon ti panes
A namagmanto iti pusok
Gapuanan iti kinabalangkantis
Nga ayat nga impagarupko
A mangted ragsak kaniak.
Ngem nagkamaliak.
Itanemkan iti daga
Tapno in-inut nga agrupsa
Ti lagipmo kaniak;
Tapno malapdan ti sabali pay
Nga irurusing ni ayat
A mangipalagip ken mangriing
Iti sugat nga ad-adda a pakasaktak.
Laglagipem, Magnolia,
Sangapulo ket tallo a tawen
A binaludnak ti turaymo,
Ngem saan nga agnanayon
A baludnak ti pagayatam.
Iti inaldaw-aldaw a tinagibik ti liday
Napukaw ti nabatbati pay a pigsak,
Ngem laglagipem daytoy:
Saan la nga ita nga aldaw
Ti aldaw nga isisingising
Dagiti nadarisay nga arapaap,
Kanayon latta nga agpitik ti pagorasan
Tapno maipasngay ti baro a namnama
A kas iti panangdayas ti kaipasngay nga init
Ti naatap a sabong ti orkidia
Tapno agbukar ken agadiwara
Ti pusaksak ken banglona...
Kunak, nalpasen nga intanemka.
Ti napalabas, ti kalman a nagbinnuligan
Dagiti naatap a pusota.
Bay-am kadin a pumusay ti ayat
Tapno diakon dung-awan
Ngem pagbiagak!
[CR//11.25.08//by.rudy.ram.rumbaoa]
______________________________
