Agtalekak Kenkuana A Sipupudno

[nabulod ti ladawan a naaramat]


No lagipek naglabas, makitak
iti panunotko dagiti biddut 
a naaramidak; ngem awan 
planok a mangbangon iti artifekto
ti awanan-bugas wenno kawaw
a tabernakulo dagiti didiosen.

Iti panangtaliawkot' nalikudak,
kas da la basura iti agdama
a mangnayon ken mangdegdeg
ti agnaynayen a ladingit.

Ket bayat panangbistayko
ti panagbabawi, namnamaek met
a masirayanak ti lawag ti kaippasngay 
a bigat, aramatek a leksion
a pakaadalak ti daan a biddut
ta saanda a pagbutngan 
iti masakbayan no di ket agbalin
a pagpangalan a mangisuro
ken mangidalan ti umno 
a dana a pagnaan.

Ti Dios ti agnanayon a sarikedked
ken mangiwanwan tunggal panagaksawko, 
agtalekak Kenkuana a sipupudno.



AGTALEKAK KENKUANA A SIPUPUDNO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
wwwtaraontibiag.blogspot.com
cr.o1.2o12.maui