Pinadasna ti nagbalin a Kupido- ket inwayatna ti maudi a plano...
Da Zen ken Eric
Sarita ni Rudy Ram. Rumbaoa
-Dagiti Koleksiona Daniw, Sarita, Kanta, ken Dadduma Pay
[naipablaak iti Bannawag, Agosto 6, 2012 Isyu]
DAMO pay laeng a panagkita ken panagsaritami ken Eric- ditoy Maui Memorial Medical Center a pagobraanmi- napugtuakon a dagus ti kinataona. Binabai. Idi ngamin yam-ammo ni Dennis kaniak, medio pinabangagna ti bosesna idi ibagana ti naganna. Ket idi yawatna dagiti dakulapna tapno makialamano kaniak, pinetpetak iti naairut dagiti ramayna ket uray la nagikkis gapu ngata iti sakitna. Inapputna pay ti ngiwatna. Napaisemak iti nalimed. Buking, kunak.
Agpapadakami a tallo a Licensed Practical Nurse ken maymaysa a yunit ti nakadestinuanmi. Agsangapulonton a tawen ni Dennis ditoy, idinto nga agpasurok a lima a tawen kaniak. Ni Eric ti agdadamo iti grupomi, kaipaspasana laeng ti kina-LPN-na.
Ngem nupay kastana ni Eric, ammona a timbengen ti garawna no adda babai a mailaok iti grupomi a tallo kada Dennis. Ngem no dakdakamin, kasta unayen ti seksi wenno kinnikinnina a magna, Kayatna nga ipadlaw a maysa a binabai. Para kang rumarampa, day, kuna ngarud ni Dennis. Uray gayam isuna, binabai met. Pagpiaanna kenkuana, saan a kas ken Eric a nalabes ti panangipadlawna.
Lalakiak! kunkuna met ni Eric. Isu a katkatawaanmi. Pasaray pay ketdi karitek nga agbalbaliw. Sayang ti kinaguapona. Siempre, impaangaw no ibagak ta dinakto ket kagura. Ngem no dadduma, pampanunotek a siakon ti mangaramid iti addang.
Dakkel ti paggidiatan ti garaw da Dennis ken Eric. Ni Dennis, simple laeng ti panaggunggunayna. No adda kursunadana, saan a basta agparaipig. Natanang. Dagiti laeng bukel ti matana ti agkuti. Saan a kas ken Eric nga uray la agikkis no adda makitana a guapo. Ngem iti laksid ti pannakaduktalko iti pudpudno a kinatao dagitoy a gagayyemko, nailimed daytoy kadagiti katrabahuanmi a babbai. Diak met ngarud kayat a siak ti mangibando. Ket daytoy ngata ti gapuna a napintas ti linnangenmi a tallo. No adda papanan ti maysa, agsusurotkami a tallo. Ket siak ti agbalin a drayberda ta agpadpadada nga awanan pay iti lisensia nga agmaneho.
Ngem nagbalbaliw ti ugali ni Eric idi naam-ammona ni Jen, maysa met laeng a nurse a katrabahuanmi iti night shift. Kasla inwagsaknan ti kinabinabaina idi masansan nga agkatrabahuanda iti maysa a yunit ti ospital.
"Agayat san ti loko," nakunak iti bagik ta pasaray makilaslasinda iti bunggoymi no kasta a malpas ti trabahomi nga agpatnag. Ket nalailo pay ti pannakisarita ni Eric ken Jen no kasta nga agdadanonkami iti lounge. Para kaniak, nasayaat a pagilasinan daytoy iti panagsubli ti naan-anay a kinalalaki ni Eric. Ta kas nakunakon, sayang laeng ti kinaguapona. Atiwennan sa pay ni Piolo Pascual no langa ken panagbagbagi laeng.
"Hay, mapagbalbaliwmo met dayta no double blade," kuna met ni Dennis nga uray la nakalawlawa ti pagindayonan ti timidna.
Iti di nagbayag, kasla nagramram nga apuy iti sibubukel nga staff ti pangrabii ti damag nga addan nagkinnaawatan da Jen ken Eric. Kas met la awan ken ni Eric. Inyad-addana ketdi ti dumdumket ken ni Jen. Saan ketdi a mailinged ti rurod ni Jen iti adu a kantiaw manipud kadagiti katrabahuanmi. Di ammo, a, no ania ti karurodna ta no sabali laeng nga Eba, amangan no atiwna payen ti alimatek a kuminnit ti kinadekketna. No siak laeng ti pagdamagam, makipinnustaak, no makursunadaan pay ti padana a babai. Masansan la ket ngarud ti panaglangan ni Jen iti trabahomi iti kallabes- tapno maliklikanna ti tsismis maipanggep kadakuada ken Eric.
Ania koma ngamin ti dakesna, aya? Baro ni Eric. Balasang ni Jen.
Ngem, ala, no di kayat ni Jen ni Eric, okey lang. Ti nasken, makatulong ni Jen iti panagbalbaliw ni Eric. Ti imasna ita, saanen a kas idi ti kinasinged ni Eric kadakami ken Dennis. Mariknak nga umad-adayo iti grupo.
Adda pay sabali a katrabahuanmi nga agkursunada ken ni Jen. Ni Marizen. Zen ti nalatak a birngasna, ken tomboy. Amin a garawna, lalaki latta. Uray pay ti panagaruat ken pannakisasaona. Ket nupay pangatiddogen ti buokna, pingpinggolenna tapno agparang ti kasla lalaki a langa ken takderna. Ket agpayso, nataer koma no lalaki daytoy.
Kanayon nga umipus-ipus ni Zen ken ni Jen. Malaksid ngamin iti kinamorena ni Jen, natayag ken napintas pay. Maibagay unay kenkuana ti panangatiddogen a buokna iti naslag a panagmatmatana. Naisem pay, kasla dina ammo ti agmisuot. Dagitoy siguro a talugading ti nakaabbukayan ti rikna ti Eric. Ngem idi madlaw ni Eric nga adda plano ti Zen ken ni Jen, kasla metten ngumerngernger nga aso. No mabalin, kayatna a kittaben dagiti gurong ni Zen gapu iti nalaus nga imonna. Pagdaksanna, narungrungsot pay ni Zen ngem ni Eric. Ni Zen, lalaki ti garawna idinto a ni Eric, babai.
Idi agnadnad, madlawmi met a kayat sa metten ni Jen ni Eric. Saan kadi ket malaksid iti kunak a kinaguapona, masirib pay. Isuna laeng ta tsismoso. Uray siak, adda dagiti banag a diak kayat kenkuana. Managdillaw ken nauyaw kadagiti katrabahuanmi, banag di magustoan dagiti kakaduami. Nalaing a sumango, ngem no aramid, awanen. Kasta ngata a talaga dagiti kas kenkuana? masalsaludsodko la ngarud iti bagik.
Ngem di met paabak ni Zen. Lalaki latta ti pustorana nga agarem. Sagutanna pay ni Jen iti tsokolate ken sabong ti rosas, banag a di maaramid ni Eric. Daytoy ti gapuna a pagduaduaak ni Eric no pudno met laeng nga agayat ken ni Jen. Wenno ar-aramidenna laeng dayta ta kayatna nga ipakita kadakami ken Dennis a maysa isuna a pudno a lalaki?
Iti naminsa a panag-window shopping-ko iti Queen Kaahumanu Shopping Center iti maysa a malem ti Sabado, nakitak ni Jen iti food arcade. Idi damo, diak malasin ta sabali gayam ti langana no saan a nakauniporme iti scrub. Ad-adda a pimmintas iti panagkitak. Adda kaduana a lalaki. Saan met ngarud a ni Eric. Idi laeng a makitak. Atapek a BF-na.
Diak nagpadlaw nga immasideg iti nagtugawanda. Nagtugawak met iti adayo bassit a malikudan ni Jen tapno nalawag a makitak ti misterioso a lalaki a kasangsangona. Nalailo ti pannakisarsarita ti lalaki ken ni Jen. Di nagbayag, timmakderen dagitoy a pimmanaw. Amangan ketdi ta nadlawdak, nakunak laengen iti nakemko. Binuybuyak ti yaadayoda. Pagam-ammuam ta sinallabay ti lalaki ni Jen. Pudno ti atapko, BF ni Jen ti lalaki.
"Aniat' makunam iti ar-aramiden ni Eric?" sinaludsod ni Dennis kaniak idi nagkitakami iti pagobraanmi iti karabiyanna.
"Dehading," insungbatko. Kineddelnak, sa ngimmato ti kidayna. Masmasdaaw.
"Panagkunam, makatulong ngata kenkuana ti ar-aramidenna?" kinuna manen ni Dennis.
"Wen, a- no di masaktan."
Nagmuregreg iti sungbatko.
Iti maysa a rabii ti Mierkules a day-off ni Eric, naipatang a maymaysa a yunit ti pagtrabahuanda da Jen ken Zen. Permi man a ragsak ni Zen ta awan ni Eric a karibalna. Maaramidna ti kaykayatna ken ni Jen. Ti dakesna, di kayat ni Jen ni Zen. Ammo ti balasang a tomboy daytoy. "An'a koma ti maganabko no padak a babai ti kainnayatko?" kinuna ni Jen iti naminsan a nagsaritakami iti lounge. Banag a nakaragsakak ta pumigsa ti namnamak iti panagbalbaliw ni Eric.
Iti sumuno a bigat, a Huebes, day-off met ni Zen. Bukod met Eric ita, nakunak a ni Jen ti adda iti panunotko. Ket agpayso, nadanonko ida iti lounge. Sabali ti nakitak a kinaragsak iti rupa ni Eric iti dayta a kanito.
"Addan sa ketdi nagkinnaawatandan," nakunak laengen ket nagturongakon iti yunit a destinok.
Iti kabigatanna, nadanonko manen ida a nakaragragsak nga agsarsarita iti lounge. Ngem asino ngarud ti lalaki a nakitak iti food arcade? Diak maiwaksi dayta a saludsod iti panunotko.
Naminsan a bigat ti Domingo, kiniddaw ni Dennis nga inkam' agwalay iti Maui Mall. Siempre, siak ti agmaneho. Ngem masapul nga addakami a tallo kas kadawyanmi. Agrason ni Eric idi damo, ngem napilitmi.
Iti mall, iti pagtagilakuan iti kawes dagiti lallaki ti tinurong ni Eric. Nagkinnitakami ken Dennis. Dati ngamin a no kasta nga inkami iti mall, iti 'yan ti kawes dagiti babbai ti umuna a turongenna. Ngem sabali iti dayta a Domingo. Ket napaisemak. Kalpasan a makagatang iti pilina a kawes, napankami met iti paglakuan iti kawes dagiti babbai. Ni Dennis met ti akimbatang a nagpili. Kalpasan dayta, nagpagnapagnakami.
"Wen gayan, day, komusta met ni Jen?" pagammuam ta sinaludsod ni Dennis ken ni Eric.
"Nas'yaat met. Ket no mabalin, dinakon aw-awagan iti day. Eric no mabalin!" Pinabangagna pay ti bosesna. Napagarikgikak la ngarud.
"'Pay, senior, talaga kadin a lalakikan?" immulagat ni Dennis.
Apagbingi ti isem ti Eric.
Diak nagtagari ta kayatko a denggen ti pagtungtongan dagitoy dua.
"Feel ko, my Friend, itultuloykon ti narugiak," indrama ni Eric. "Mariknak ngamin nga agayatakon ken ni Jen." Ngem limmidem ti rupana idi agangay.
"'Pay?" sinaludsod ni Dennis.
"Adda problemak," kunana. "Adda karibalko, ni Zen. Ti babaina'tdiayen!" Nagrupanget.
"Ania ti pagproblemaam ita? Sika met laeng ti nagkuna a babai ni Zen," insampitawko. Maragsakanak a saan iti itsurana. "Iti pagammom, kayat ngata ni Jen ni Zen?"
"Ditay maibaga, a, gayyem," kinuna ni Eric.
"May the best man win, a!" kinuna ni Dennis.
"Sport-ak. Ngem diak maibaga a maawatko no bilang maabakak."
Nagkinnitakami ken Dennis. Dimin inlimed ti panaginnisemmi.
"Pudno a lalakikan, mama," kinuna ketdi ni Dennis. Ngem nagparagipig met ni Eric.
Iti panunotko, kayatkon nga ipudno ken ni Eric ti nakitak a lalaki a kadua ni Jen. Ngem apay koma? Bay-ak nga isunto ti makaduktal. Maderder la ketdi pusona no kaskasano.
Dandani agalas dose iti aldaw idi agawisda a mangaldawkami. Tinurongmi ti paboritomi a food arcade, iti Queen Kaahumanu Center. Nagtugawkami iti lamisaan a kasinnango ti Panda Express. Kadakami a tallo, mapusgan ti maysa a mapan agorder iti taraonmi. Sinnublat. Ni Dennis ti akimbatang.
Palpaliiwek ni Eric no adda kayatna nga ibaga maipaggep iti love proposal-na ken ni Jen. Ngem naulimek daytoy bayat ti panangbidingbidingna iti cellphone nga iggemna. Makite-text. Binay-ak. Ngem anian a kigtotko idi makitak ni Jen a kaduana ti BF-na nga agturong iti food arcade, iti direksion ti lamisaan a 'yanmi. Diak makaidna, ngem diak nagpadlaw ken ni Eric. Busy iti cellphone-na.
Immisem ni Jen apaman a nakitanak. Ngem kasla naklaat idi malasinna ni Eric a nakatugaw a sumango kaniak. Saan a makita ni Eric ta nakadumog ken nakalikud ken ni Jen. Immasidegda iti 'yanmi ken Eric. Apagisu met nga agsubli iti tugawmi ni Dennis nga arigna nakakita iti al-alia.
"Hi, Jen!" inkablaaw ni Dennis.
Kasla nakapuot a tur-og a guardia ni Eric. Nakigtot ngata iti nangngegna. Ket iti panangyangadna iti ulona, saannan a ninamnama ti makitana iti likudanna.
"Boyfriend-mo?" kinuna ni Dennis ken ni Jen; intudona ti kadua daytoy a lalaki.
Immisem iti apagbingi ni Jen, sa nagtung-ed. "Ni Karl."
Nailabeg ni Eric. Kasla di mamati. Di payen makatimek, piman.
Nalpas! nakunak met iti panunotko. Ania pay ita ti planok?
"Sige, enjoy your lunch!" kinuna ni Jen, ket inawisnan ti boyfriend-na a mapan agorder iti pangaldawda.
Iti suli dagiti matak, makitak ti nalaus nga imon ni Eric. Nakanganga lattan a nangbuya iti yaadayo dagiti dua.
Manipud daydi, saanen a kas iti dati ni Eric. Kasla awan ganaygayna nga agtrabaho. Kasla nalaylay a sabong ti langana. Saanda payen nga agkatrabaho ken Jen iti maymaysa a yunit. Nadamagko laengen a kiniddawna iti scheduling supervisor a baliwan daytoy ti shift a panagobrana. Day shift. Atapek a riniknana unay iti kaadda ti boybriend ni Jen. Ket patiek nga agsubli manen iti dati a kinataona. Banag a pakasayangak unay. Ngem diak nauray ti namnamaek. Ket simken iti panunotko ni Zen.
Agar-arimukamok iti dayta a rabii ti Lunes idi mapasungadak ti lugan ni Zen. Adda ngamin ugalik nga agestambay pay laeng nga umuna iti uneg ti luganko iti parkingan ti ospital sakbay a sumrekak iti pagtrabahuak. Agkape ken agsigarilioak. Napalabas ngatan ti lima a minuto idi dumteng ti nakapegpegges a lugan ni Zen. Apaman a naisimpana ti luganna iti parkingan, dagus a simrek iti ospital. Nasdaawak. Iti unegko, amangan no naammuanna metten nga adda boyfriend ni Jen. Inigupko metten ti kapek sa nagdardarasak met a simrek iti ospital. Kayatko a maammuan no pudno ti atapko.
Diak nakita ni Zen iti lounge, ket atapek a nagturongen iti yunit a pagtrabahuanna. Kuna dagiti kakaduami a da Laurie, MJ ken Vangie a kasla agpupungtot a pimmanaw ni Zen kalpasan a makapag-clock-in.
A, love triangle! nakunak. Ket nabiag ti namnamak nga agballigi ni Eric iti kalikagumna nga agbalbaliw. Patiek a dina ay-ayaten ni Jen. Ar-aramatenna laeng nga inspirasionna iti kunana a panagbalbaliwna. Kasunganina ni Zen, babai ti kinataona ngem lalaki rikna daytoy. No diak mayadayo kada Jen ken Karl, amangan no adda dakes a maaramidna.
Ngem makabulan kalpasan ti panagkukuyogmi kada Eric ken Dennis iti food arcade ti Queen Kaahumanu Shopping Center, awanen ti damagko kada Eric ken Zen. Ta uray ni Zen, day-shift metten. Naamirisko a mayadayon ni Zen kaniak, ken kangrunaanna, marugpon ti grupomi a tallo kada Dennis ken Eric. Ket nangbukelak iti maysa a plano.
Iti maikatlo a Domingo, agkasangay ni Eric. Inawisko ni Dennis a mapan gumatang iti komporme la ditan nga iregalomi kenkuana. Imbagak ken ni Dennis a kadagitoy a tiempo ti pannakasapul ni Eric iti liwliwa. Ta ammok nga uray material la a banag ti sagutmi, maalay-ayan met ti sakit ti nakemna gapu iti pannakapaayna ken ayat.
Kalpasan a nagatangmi ti regalomi, nagturongkami iti Foodland. Gimmatangami iti karnet' baboy, baka ken lames a maituno.
ALDAW ti kasangay ni Eric. Diak pay nalpaan a nangaldaw , tinarengtengkon a dinagas ni Dennis iti pagtaenganda. Tinurongmi ti asideg ti Maui Laui Subdivision, ti pagtaengan ni Eric. Awan naimbitaran kadagiti katrabahuanmi malaksid ken ni Zen. Siak laeng ti nagnaknakem iti daytoy ta kayatko ida a kapatang ken Eric.
Agalas sais ngatan iti malem idi naiwakasmi ken Dennis ti nagtuno. Nabaknang ti taraon a naisagana ta malaksid iti pork barbeque, beef steak, grilled chicken wings, natuno a lames, adda pay ahi poke shoyu, tako poke, lobster a pupus ken tallo botelia a champagne. In-inut metten nga agkarayam ti sipnget gapu iti pananglinged dagiti marahigante a bantay iti Iao Valley iti lawag ti init.
Naguni ti doorbell. Ammok a ni Zen ti simmangpet. Siak ti nagboluntario a mangilukat iti ridaw ta iti likud ti balay ti nagtunnuanmi. Sa maysa pay, diak kayat nga ibaga kada Dennis ken Eric nga inimbitarak ni Zen tapno di maperdi ti planok. Inkarigatak idi a kinasarita ni Zen. Amangan no ania ti maaramidna. Binagbagaak. Nabayag. Awan naglawlawagan ti nagsaritaanmi- panagriknak ket limmusot amin iti bangir a lapayagna dagiti imbagbagak, malaksid iti panangipasiguradona iti idadar-ayna iti kasangay ni Eric.
Anian a siddaawko idi ilukatkon ti ridaw. Nakapimpintas met la unayen ti panagkitak ken ni Zen! Ti lalaki a pustora ken panagar-aruatna idi, sabali metten- ta nakapimpintas a dayag ti adda iti sanguanak. Nagbestida pay daytoy ken winakrayna ti buokna.
Pinastrekko ni Zen. Intudok iti likud ti balay nga ayanmi a tallo. Immisem ket nagparang ti naslag nga agar-araap a matana. Ngem intulagko ken ni Zen a saan pay laeng nga agpakpakita kada Dennis ken Eric. Pinagbatik iti ridaw. "Siak ti makaammo," kinunak. Kayatko a masurpresada a dua.
"'Sin' didiay?" sinaludsod ni Dennis idi makasubliak iti 'yanda.
"Dati a katrabahuantayo," insungbatko nga umis-isem.
"Awisem ketdi ditoyen ta rugiantayon. Sayang ti rabii no agmiminnulagattayo lattan!" kinuna ni Eric.
Pudno ti kuna ni Eric, sayang ti rabii no awan mapasamak. Panagkunak, agmulagatka ita.
"Adda surprise gift-ko kenka," kinunak ken ni Eric.
"Ayapo, Martin, nakaad-adu unay nga artem. 'Yabam ketdin, 'la!" imbugtakna kaniak. Simro manen ti kinabaklana.
"Ikidemyo dagiti matayo ken tumallikudkay' pay nga umuna ken Dennis tapno adda met suspense-na," imbilinko. "Alan."
Awan naaramidanda. Kapilitan a timmallikudda.
"Ket no ibagak nga agmulagat ken sumangokayton, sumangokayo, wen?"
"Ala, wen," kinuna ni Eric ket timmalikuden.
Pinayapayak ni Zen nga umasideg iti abayko. "Okey, mabalinyon nga imulagat dagiti matayo ket sumangokayon kaniak," kinunak.
Kasta unay ti siddaawda nga agpadpada. Kasla di mamati ni Dennis. Nailabeg met ni Eric. Makaisemak ta dina payen maisina dagiti matana ken ni Zen. Di pay agkirem!
"O, ania ti makunayo iti balasangko?" inyangawko.
"Kinninisna!" kinuna ni Dennis. "Gaga! Napimpintaska met gayam ngem siak! Apay nga agtomtomboyka?"
"Ket ni Eric, apay nga agbaklabakla ket nakaguguapo met?" imbales ni Zen, natangken latta ti bosesna.
"Kinninisna manen." Ni Dennis latta. "Nakaammuam?"
"No nalaingkay a dumlaw, kastakami met!" kinuna manen ni Zen.
"Desididoka iti dayta, mama?" imbannikesen ni Dennis. Rimmuaren ti kinababaina ta kasla di mamati iti makitkitana.
"Panagkunak, wen," intung-ed ni Zen, limmamuyoten ti timekna.
"Hay, ipagarupko pay met a hanhantingem itan ni Karl gapu iti pannakapaaymo ken ni Jen. Naturedkayo, di ba? Saan a kas kadakami a ... pamrayanmi ti agmukmok , ano pa?"
Nagkatawa ni Zen.
Ngem ni Eric, nakanganga pay laeng. Sabali la ket ngarud ti nagrehistro iti panunotko. "Napanen, bebe," nakunak iti nakemko. Saan kadi nga isu dayta ti gandatko? Napaayda nga agpadpada ken Jen, ngem mabalin nga isu met ti makapagbalbaliw kadakuada.
"'Pay a kasta't panagkitam kaniak, ha?" kuna ni Zen ken ni Eric. "Kayatmo ta disnogenka?" naginlalayat iti gemgemna.
"Ne-ay, saan, a! Peace na tayo!" immisem ni Eric. Inasitganna ni Zen.
Saan met a nagtukiad ni Zen idi iggaman ni Eric ti dakulapna. "Umayka ditoy ta rugiantayon ti mangan," nakalalailo ni Eric.
"Happy Birthday!" kinablaawan ni Zen.
"Thank you. Imbag ta nakaumayka," pinerrengna ni Zen
"Ni Martin ti nangimbita kaniak," tinaliawnak.
"Sika, a! Dimo la imbaga ti planom. Ngem thank you manen, Zen!" nakaragragsaken ti langa ni Eric.
Inyawatan ni Eric ni Zen iti beef steak. "Agsaritatanto no madamdama, wen?" bimmangag manen ti bosesna.
Nagkinnitakami ken Dennis ket naginnapirkami iti nalimed. Nagparagipig dagiti patongmi iti di mailadawan a ragsak.-O
Sarita ni Rudy Ram. Rumbaoa
-Dagiti Koleksiona Daniw, Sarita, Kanta, ken Dadduma Pay
[naipablaak iti Bannawag, Agosto 6, 2012 Isyu]
DAMO pay laeng a panagkita ken panagsaritami ken Eric- ditoy Maui Memorial Medical Center a pagobraanmi- napugtuakon a dagus ti kinataona. Binabai. Idi ngamin yam-ammo ni Dennis kaniak, medio pinabangagna ti bosesna idi ibagana ti naganna. Ket idi yawatna dagiti dakulapna tapno makialamano kaniak, pinetpetak iti naairut dagiti ramayna ket uray la nagikkis gapu ngata iti sakitna. Inapputna pay ti ngiwatna. Napaisemak iti nalimed. Buking, kunak.
Agpapadakami a tallo a Licensed Practical Nurse ken maymaysa a yunit ti nakadestinuanmi. Agsangapulonton a tawen ni Dennis ditoy, idinto nga agpasurok a lima a tawen kaniak. Ni Eric ti agdadamo iti grupomi, kaipaspasana laeng ti kina-LPN-na.
Ngem nupay kastana ni Eric, ammona a timbengen ti garawna no adda babai a mailaok iti grupomi a tallo kada Dennis. Ngem no dakdakamin, kasta unayen ti seksi wenno kinnikinnina a magna, Kayatna nga ipadlaw a maysa a binabai. Para kang rumarampa, day, kuna ngarud ni Dennis. Uray gayam isuna, binabai met. Pagpiaanna kenkuana, saan a kas ken Eric a nalabes ti panangipadlawna.
Lalakiak! kunkuna met ni Eric. Isu a katkatawaanmi. Pasaray pay ketdi karitek nga agbalbaliw. Sayang ti kinaguapona. Siempre, impaangaw no ibagak ta dinakto ket kagura. Ngem no dadduma, pampanunotek a siakon ti mangaramid iti addang.
Dakkel ti paggidiatan ti garaw da Dennis ken Eric. Ni Dennis, simple laeng ti panaggunggunayna. No adda kursunadana, saan a basta agparaipig. Natanang. Dagiti laeng bukel ti matana ti agkuti. Saan a kas ken Eric nga uray la agikkis no adda makitana a guapo. Ngem iti laksid ti pannakaduktalko iti pudpudno a kinatao dagitoy a gagayyemko, nailimed daytoy kadagiti katrabahuanmi a babbai. Diak met ngarud kayat a siak ti mangibando. Ket daytoy ngata ti gapuna a napintas ti linnangenmi a tallo. No adda papanan ti maysa, agsusurotkami a tallo. Ket siak ti agbalin a drayberda ta agpadpadada nga awanan pay iti lisensia nga agmaneho.
Ngem nagbalbaliw ti ugali ni Eric idi naam-ammona ni Jen, maysa met laeng a nurse a katrabahuanmi iti night shift. Kasla inwagsaknan ti kinabinabaina idi masansan nga agkatrabahuanda iti maysa a yunit ti ospital.
"Agayat san ti loko," nakunak iti bagik ta pasaray makilaslasinda iti bunggoymi no kasta a malpas ti trabahomi nga agpatnag. Ket nalailo pay ti pannakisarita ni Eric ken Jen no kasta nga agdadanonkami iti lounge. Para kaniak, nasayaat a pagilasinan daytoy iti panagsubli ti naan-anay a kinalalaki ni Eric. Ta kas nakunakon, sayang laeng ti kinaguapona. Atiwennan sa pay ni Piolo Pascual no langa ken panagbagbagi laeng.
"Hay, mapagbalbaliwmo met dayta no double blade," kuna met ni Dennis nga uray la nakalawlawa ti pagindayonan ti timidna.
Iti di nagbayag, kasla nagramram nga apuy iti sibubukel nga staff ti pangrabii ti damag nga addan nagkinnaawatan da Jen ken Eric. Kas met la awan ken ni Eric. Inyad-addana ketdi ti dumdumket ken ni Jen. Saan ketdi a mailinged ti rurod ni Jen iti adu a kantiaw manipud kadagiti katrabahuanmi. Di ammo, a, no ania ti karurodna ta no sabali laeng nga Eba, amangan no atiwna payen ti alimatek a kuminnit ti kinadekketna. No siak laeng ti pagdamagam, makipinnustaak, no makursunadaan pay ti padana a babai. Masansan la ket ngarud ti panaglangan ni Jen iti trabahomi iti kallabes- tapno maliklikanna ti tsismis maipanggep kadakuada ken Eric.
Ania koma ngamin ti dakesna, aya? Baro ni Eric. Balasang ni Jen.
Ngem, ala, no di kayat ni Jen ni Eric, okey lang. Ti nasken, makatulong ni Jen iti panagbalbaliw ni Eric. Ti imasna ita, saanen a kas idi ti kinasinged ni Eric kadakami ken Dennis. Mariknak nga umad-adayo iti grupo.
Adda pay sabali a katrabahuanmi nga agkursunada ken ni Jen. Ni Marizen. Zen ti nalatak a birngasna, ken tomboy. Amin a garawna, lalaki latta. Uray pay ti panagaruat ken pannakisasaona. Ket nupay pangatiddogen ti buokna, pingpinggolenna tapno agparang ti kasla lalaki a langa ken takderna. Ket agpayso, nataer koma no lalaki daytoy.
Kanayon nga umipus-ipus ni Zen ken ni Jen. Malaksid ngamin iti kinamorena ni Jen, natayag ken napintas pay. Maibagay unay kenkuana ti panangatiddogen a buokna iti naslag a panagmatmatana. Naisem pay, kasla dina ammo ti agmisuot. Dagitoy siguro a talugading ti nakaabbukayan ti rikna ti Eric. Ngem idi madlaw ni Eric nga adda plano ti Zen ken ni Jen, kasla metten ngumerngernger nga aso. No mabalin, kayatna a kittaben dagiti gurong ni Zen gapu iti nalaus nga imonna. Pagdaksanna, narungrungsot pay ni Zen ngem ni Eric. Ni Zen, lalaki ti garawna idinto a ni Eric, babai.
Idi agnadnad, madlawmi met a kayat sa metten ni Jen ni Eric. Saan kadi ket malaksid iti kunak a kinaguapona, masirib pay. Isuna laeng ta tsismoso. Uray siak, adda dagiti banag a diak kayat kenkuana. Managdillaw ken nauyaw kadagiti katrabahuanmi, banag di magustoan dagiti kakaduami. Nalaing a sumango, ngem no aramid, awanen. Kasta ngata a talaga dagiti kas kenkuana? masalsaludsodko la ngarud iti bagik.
Ngem di met paabak ni Zen. Lalaki latta ti pustorana nga agarem. Sagutanna pay ni Jen iti tsokolate ken sabong ti rosas, banag a di maaramid ni Eric. Daytoy ti gapuna a pagduaduaak ni Eric no pudno met laeng nga agayat ken ni Jen. Wenno ar-aramidenna laeng dayta ta kayatna nga ipakita kadakami ken Dennis a maysa isuna a pudno a lalaki?
Iti naminsa a panag-window shopping-ko iti Queen Kaahumanu Shopping Center iti maysa a malem ti Sabado, nakitak ni Jen iti food arcade. Idi damo, diak malasin ta sabali gayam ti langana no saan a nakauniporme iti scrub. Ad-adda a pimmintas iti panagkitak. Adda kaduana a lalaki. Saan met ngarud a ni Eric. Idi laeng a makitak. Atapek a BF-na.
Diak nagpadlaw nga immasideg iti nagtugawanda. Nagtugawak met iti adayo bassit a malikudan ni Jen tapno nalawag a makitak ti misterioso a lalaki a kasangsangona. Nalailo ti pannakisarsarita ti lalaki ken ni Jen. Di nagbayag, timmakderen dagitoy a pimmanaw. Amangan ketdi ta nadlawdak, nakunak laengen iti nakemko. Binuybuyak ti yaadayoda. Pagam-ammuam ta sinallabay ti lalaki ni Jen. Pudno ti atapko, BF ni Jen ti lalaki.
"Aniat' makunam iti ar-aramiden ni Eric?" sinaludsod ni Dennis kaniak idi nagkitakami iti pagobraanmi iti karabiyanna.
"Dehading," insungbatko. Kineddelnak, sa ngimmato ti kidayna. Masmasdaaw.
"Panagkunam, makatulong ngata kenkuana ti ar-aramidenna?" kinuna manen ni Dennis.
"Wen, a- no di masaktan."
Nagmuregreg iti sungbatko.
Iti maysa a rabii ti Mierkules a day-off ni Eric, naipatang a maymaysa a yunit ti pagtrabahuanda da Jen ken Zen. Permi man a ragsak ni Zen ta awan ni Eric a karibalna. Maaramidna ti kaykayatna ken ni Jen. Ti dakesna, di kayat ni Jen ni Zen. Ammo ti balasang a tomboy daytoy. "An'a koma ti maganabko no padak a babai ti kainnayatko?" kinuna ni Jen iti naminsan a nagsaritakami iti lounge. Banag a nakaragsakak ta pumigsa ti namnamak iti panagbalbaliw ni Eric.
Iti sumuno a bigat, a Huebes, day-off met ni Zen. Bukod met Eric ita, nakunak a ni Jen ti adda iti panunotko. Ket agpayso, nadanonko ida iti lounge. Sabali ti nakitak a kinaragsak iti rupa ni Eric iti dayta a kanito.
"Addan sa ketdi nagkinnaawatandan," nakunak laengen ket nagturongakon iti yunit a destinok.
Iti kabigatanna, nadanonko manen ida a nakaragragsak nga agsarsarita iti lounge. Ngem asino ngarud ti lalaki a nakitak iti food arcade? Diak maiwaksi dayta a saludsod iti panunotko.
Naminsan a bigat ti Domingo, kiniddaw ni Dennis nga inkam' agwalay iti Maui Mall. Siempre, siak ti agmaneho. Ngem masapul nga addakami a tallo kas kadawyanmi. Agrason ni Eric idi damo, ngem napilitmi.
Iti mall, iti pagtagilakuan iti kawes dagiti lallaki ti tinurong ni Eric. Nagkinnitakami ken Dennis. Dati ngamin a no kasta nga inkami iti mall, iti 'yan ti kawes dagiti babbai ti umuna a turongenna. Ngem sabali iti dayta a Domingo. Ket napaisemak. Kalpasan a makagatang iti pilina a kawes, napankami met iti paglakuan iti kawes dagiti babbai. Ni Dennis met ti akimbatang a nagpili. Kalpasan dayta, nagpagnapagnakami.
"Wen gayan, day, komusta met ni Jen?" pagammuam ta sinaludsod ni Dennis ken ni Eric.
"Nas'yaat met. Ket no mabalin, dinakon aw-awagan iti day. Eric no mabalin!" Pinabangagna pay ti bosesna. Napagarikgikak la ngarud.
"'Pay, senior, talaga kadin a lalakikan?" immulagat ni Dennis.
Apagbingi ti isem ti Eric.
Diak nagtagari ta kayatko a denggen ti pagtungtongan dagitoy dua.
"Feel ko, my Friend, itultuloykon ti narugiak," indrama ni Eric. "Mariknak ngamin nga agayatakon ken ni Jen." Ngem limmidem ti rupana idi agangay.
"'Pay?" sinaludsod ni Dennis.
"Adda problemak," kunana. "Adda karibalko, ni Zen. Ti babaina'tdiayen!" Nagrupanget.
"Ania ti pagproblemaam ita? Sika met laeng ti nagkuna a babai ni Zen," insampitawko. Maragsakanak a saan iti itsurana. "Iti pagammom, kayat ngata ni Jen ni Zen?"
"Ditay maibaga, a, gayyem," kinuna ni Eric.
"May the best man win, a!" kinuna ni Dennis.
"Sport-ak. Ngem diak maibaga a maawatko no bilang maabakak."
Nagkinnitakami ken Dennis. Dimin inlimed ti panaginnisemmi.
"Pudno a lalakikan, mama," kinuna ketdi ni Dennis. Ngem nagparagipig met ni Eric.
Iti panunotko, kayatkon nga ipudno ken ni Eric ti nakitak a lalaki a kadua ni Jen. Ngem apay koma? Bay-ak nga isunto ti makaduktal. Maderder la ketdi pusona no kaskasano.
Dandani agalas dose iti aldaw idi agawisda a mangaldawkami. Tinurongmi ti paboritomi a food arcade, iti Queen Kaahumanu Center. Nagtugawkami iti lamisaan a kasinnango ti Panda Express. Kadakami a tallo, mapusgan ti maysa a mapan agorder iti taraonmi. Sinnublat. Ni Dennis ti akimbatang.
Palpaliiwek ni Eric no adda kayatna nga ibaga maipaggep iti love proposal-na ken ni Jen. Ngem naulimek daytoy bayat ti panangbidingbidingna iti cellphone nga iggemna. Makite-text. Binay-ak. Ngem anian a kigtotko idi makitak ni Jen a kaduana ti BF-na nga agturong iti food arcade, iti direksion ti lamisaan a 'yanmi. Diak makaidna, ngem diak nagpadlaw ken ni Eric. Busy iti cellphone-na.
Immisem ni Jen apaman a nakitanak. Ngem kasla naklaat idi malasinna ni Eric a nakatugaw a sumango kaniak. Saan a makita ni Eric ta nakadumog ken nakalikud ken ni Jen. Immasidegda iti 'yanmi ken Eric. Apagisu met nga agsubli iti tugawmi ni Dennis nga arigna nakakita iti al-alia.
"Hi, Jen!" inkablaaw ni Dennis.
Kasla nakapuot a tur-og a guardia ni Eric. Nakigtot ngata iti nangngegna. Ket iti panangyangadna iti ulona, saannan a ninamnama ti makitana iti likudanna.
"Boyfriend-mo?" kinuna ni Dennis ken ni Jen; intudona ti kadua daytoy a lalaki.
Immisem iti apagbingi ni Jen, sa nagtung-ed. "Ni Karl."
Nailabeg ni Eric. Kasla di mamati. Di payen makatimek, piman.
Nalpas! nakunak met iti panunotko. Ania pay ita ti planok?
"Sige, enjoy your lunch!" kinuna ni Jen, ket inawisnan ti boyfriend-na a mapan agorder iti pangaldawda.
Iti suli dagiti matak, makitak ti nalaus nga imon ni Eric. Nakanganga lattan a nangbuya iti yaadayo dagiti dua.
Manipud daydi, saanen a kas iti dati ni Eric. Kasla awan ganaygayna nga agtrabaho. Kasla nalaylay a sabong ti langana. Saanda payen nga agkatrabaho ken Jen iti maymaysa a yunit. Nadamagko laengen a kiniddawna iti scheduling supervisor a baliwan daytoy ti shift a panagobrana. Day shift. Atapek a riniknana unay iti kaadda ti boybriend ni Jen. Ket patiek nga agsubli manen iti dati a kinataona. Banag a pakasayangak unay. Ngem diak nauray ti namnamaek. Ket simken iti panunotko ni Zen.
Agar-arimukamok iti dayta a rabii ti Lunes idi mapasungadak ti lugan ni Zen. Adda ngamin ugalik nga agestambay pay laeng nga umuna iti uneg ti luganko iti parkingan ti ospital sakbay a sumrekak iti pagtrabahuak. Agkape ken agsigarilioak. Napalabas ngatan ti lima a minuto idi dumteng ti nakapegpegges a lugan ni Zen. Apaman a naisimpana ti luganna iti parkingan, dagus a simrek iti ospital. Nasdaawak. Iti unegko, amangan no naammuanna metten nga adda boyfriend ni Jen. Inigupko metten ti kapek sa nagdardarasak met a simrek iti ospital. Kayatko a maammuan no pudno ti atapko.
Diak nakita ni Zen iti lounge, ket atapek a nagturongen iti yunit a pagtrabahuanna. Kuna dagiti kakaduami a da Laurie, MJ ken Vangie a kasla agpupungtot a pimmanaw ni Zen kalpasan a makapag-clock-in.
A, love triangle! nakunak. Ket nabiag ti namnamak nga agballigi ni Eric iti kalikagumna nga agbalbaliw. Patiek a dina ay-ayaten ni Jen. Ar-aramatenna laeng nga inspirasionna iti kunana a panagbalbaliwna. Kasunganina ni Zen, babai ti kinataona ngem lalaki rikna daytoy. No diak mayadayo kada Jen ken Karl, amangan no adda dakes a maaramidna.
Ngem makabulan kalpasan ti panagkukuyogmi kada Eric ken Dennis iti food arcade ti Queen Kaahumanu Shopping Center, awanen ti damagko kada Eric ken Zen. Ta uray ni Zen, day-shift metten. Naamirisko a mayadayon ni Zen kaniak, ken kangrunaanna, marugpon ti grupomi a tallo kada Dennis ken Eric. Ket nangbukelak iti maysa a plano.
Iti maikatlo a Domingo, agkasangay ni Eric. Inawisko ni Dennis a mapan gumatang iti komporme la ditan nga iregalomi kenkuana. Imbagak ken ni Dennis a kadagitoy a tiempo ti pannakasapul ni Eric iti liwliwa. Ta ammok nga uray material la a banag ti sagutmi, maalay-ayan met ti sakit ti nakemna gapu iti pannakapaayna ken ayat.
Kalpasan a nagatangmi ti regalomi, nagturongkami iti Foodland. Gimmatangami iti karnet' baboy, baka ken lames a maituno.
ALDAW ti kasangay ni Eric. Diak pay nalpaan a nangaldaw , tinarengtengkon a dinagas ni Dennis iti pagtaenganda. Tinurongmi ti asideg ti Maui Laui Subdivision, ti pagtaengan ni Eric. Awan naimbitaran kadagiti katrabahuanmi malaksid ken ni Zen. Siak laeng ti nagnaknakem iti daytoy ta kayatko ida a kapatang ken Eric.
Agalas sais ngatan iti malem idi naiwakasmi ken Dennis ti nagtuno. Nabaknang ti taraon a naisagana ta malaksid iti pork barbeque, beef steak, grilled chicken wings, natuno a lames, adda pay ahi poke shoyu, tako poke, lobster a pupus ken tallo botelia a champagne. In-inut metten nga agkarayam ti sipnget gapu iti pananglinged dagiti marahigante a bantay iti Iao Valley iti lawag ti init.
Naguni ti doorbell. Ammok a ni Zen ti simmangpet. Siak ti nagboluntario a mangilukat iti ridaw ta iti likud ti balay ti nagtunnuanmi. Sa maysa pay, diak kayat nga ibaga kada Dennis ken Eric nga inimbitarak ni Zen tapno di maperdi ti planok. Inkarigatak idi a kinasarita ni Zen. Amangan no ania ti maaramidna. Binagbagaak. Nabayag. Awan naglawlawagan ti nagsaritaanmi- panagriknak ket limmusot amin iti bangir a lapayagna dagiti imbagbagak, malaksid iti panangipasiguradona iti idadar-ayna iti kasangay ni Eric.
Anian a siddaawko idi ilukatkon ti ridaw. Nakapimpintas met la unayen ti panagkitak ken ni Zen! Ti lalaki a pustora ken panagar-aruatna idi, sabali metten- ta nakapimpintas a dayag ti adda iti sanguanak. Nagbestida pay daytoy ken winakrayna ti buokna.
Pinastrekko ni Zen. Intudok iti likud ti balay nga ayanmi a tallo. Immisem ket nagparang ti naslag nga agar-araap a matana. Ngem intulagko ken ni Zen a saan pay laeng nga agpakpakita kada Dennis ken Eric. Pinagbatik iti ridaw. "Siak ti makaammo," kinunak. Kayatko a masurpresada a dua.
"'Sin' didiay?" sinaludsod ni Dennis idi makasubliak iti 'yanda.
"Dati a katrabahuantayo," insungbatko nga umis-isem.
"Awisem ketdi ditoyen ta rugiantayon. Sayang ti rabii no agmiminnulagattayo lattan!" kinuna ni Eric.
Pudno ti kuna ni Eric, sayang ti rabii no awan mapasamak. Panagkunak, agmulagatka ita.
"Adda surprise gift-ko kenka," kinunak ken ni Eric.
"Ayapo, Martin, nakaad-adu unay nga artem. 'Yabam ketdin, 'la!" imbugtakna kaniak. Simro manen ti kinabaklana.
"Ikidemyo dagiti matayo ken tumallikudkay' pay nga umuna ken Dennis tapno adda met suspense-na," imbilinko. "Alan."
Awan naaramidanda. Kapilitan a timmallikudda.
"Ket no ibagak nga agmulagat ken sumangokayton, sumangokayo, wen?"
"Ala, wen," kinuna ni Eric ket timmalikuden.
Pinayapayak ni Zen nga umasideg iti abayko. "Okey, mabalinyon nga imulagat dagiti matayo ket sumangokayon kaniak," kinunak.
Kasta unay ti siddaawda nga agpadpada. Kasla di mamati ni Dennis. Nailabeg met ni Eric. Makaisemak ta dina payen maisina dagiti matana ken ni Zen. Di pay agkirem!
"O, ania ti makunayo iti balasangko?" inyangawko.
"Kinninisna!" kinuna ni Dennis. "Gaga! Napimpintaska met gayam ngem siak! Apay nga agtomtomboyka?"
"Ket ni Eric, apay nga agbaklabakla ket nakaguguapo met?" imbales ni Zen, natangken latta ti bosesna.
"Kinninisna manen." Ni Dennis latta. "Nakaammuam?"
"No nalaingkay a dumlaw, kastakami met!" kinuna manen ni Zen.
"Desididoka iti dayta, mama?" imbannikesen ni Dennis. Rimmuaren ti kinababaina ta kasla di mamati iti makitkitana.
"Panagkunak, wen," intung-ed ni Zen, limmamuyoten ti timekna.
"Hay, ipagarupko pay met a hanhantingem itan ni Karl gapu iti pannakapaaymo ken ni Jen. Naturedkayo, di ba? Saan a kas kadakami a ... pamrayanmi ti agmukmok , ano pa?"
Nagkatawa ni Zen.
Ngem ni Eric, nakanganga pay laeng. Sabali la ket ngarud ti nagrehistro iti panunotko. "Napanen, bebe," nakunak iti nakemko. Saan kadi nga isu dayta ti gandatko? Napaayda nga agpadpada ken Jen, ngem mabalin nga isu met ti makapagbalbaliw kadakuada.
"'Pay a kasta't panagkitam kaniak, ha?" kuna ni Zen ken ni Eric. "Kayatmo ta disnogenka?" naginlalayat iti gemgemna.
"Ne-ay, saan, a! Peace na tayo!" immisem ni Eric. Inasitganna ni Zen.
Saan met a nagtukiad ni Zen idi iggaman ni Eric ti dakulapna. "Umayka ditoy ta rugiantayon ti mangan," nakalalailo ni Eric.
"Happy Birthday!" kinablaawan ni Zen.
"Thank you. Imbag ta nakaumayka," pinerrengna ni Zen
"Ni Martin ti nangimbita kaniak," tinaliawnak.
"Sika, a! Dimo la imbaga ti planom. Ngem thank you manen, Zen!" nakaragragsaken ti langa ni Eric.
Inyawatan ni Eric ni Zen iti beef steak. "Agsaritatanto no madamdama, wen?" bimmangag manen ti bosesna.
Nagkinnitakami ken Dennis ket naginnapirkami iti nalimed. Nagparagipig dagiti patongmi iti di mailadawan a ragsak.-O
No comments:
Post a Comment