A Sika, Saanka nga Agmaymaysa

[Nabulod laeng ti ladawan a naaramat iti daniw]




Ninasnasak iti nadalus a rigis 
ti tawa nga asideg ti indayonmo,
dita ti pagtuppuaran dagiti bituen

nga agrangrang iti tangatang
isuda't silnag nakudrep a lugar;
a sika, saanka nga agmaymaysa.

Agkinniak ket tuladek tao a narapis
a magna iti patag a kalsada, ditoy 
ti pagdissoan ken pagguummongan

dagiti tumatayab; agkanta ken agsalada;
a sika, saanka nga agmaymaysa
nga agbaniaga iti papanam.

Ket iti pantok ti kangatoan a turod
sallukobannaka narukbos a kayo
tapno linongannaka, makainana ket


ti angin pug-awanka inka mailibay;
a sika, saanka nga agmaymaysa
iti lubong kaduanak dita sibay...

A SIKA, SAANKA NGA AGMAYMAYSA

Rudy Ram. Rumbaoa

Dagiti Koleksion a Daniw, Sarita, Kanta, ken Dadduma Pay

www.samiwengkenayatnirudy.blogspot.com

Copyright.by.Rudy.Ram.Rumbaoa.6.26.2011]