Sika ti Inak

[Adelindes R. Rumbaoa]

Maysaka a bendision
Manipud ngato, sagut
Ti ayat- eternidad.

Mannaripato sipud naitaoak
Iti tunggal pitik ti puso, karamanak-
Agyamanak.

Nasikap a manursuro
Inturongnak iti umno
Tapno ti dana a talaytayek

Diak mayaw-awan; nalupoy man
A takiag, sindadaan a tumulong-
Ammom pagkurangan ken pagkapsutak.

Maysaka a gayyem, mapagtalkan
Agnanayon nga adda sadiay ti abaga
A pangisadagak bantot ti problema;

Sindadaanka a mangsippaw kaniak no matnagak-
Nalap-it man ngem kas pader ti pigsa.
Maysaka a mangngagas a makarikna

Iti an-anek-eken rikna; arakupen
Ken agkannak tapno siak ti malag-anan
Sagubanit a nagtaeng iti lasag-

Sika ti Inak, tali ti biag a nakaigalutak.



SIKA TI INAK [Iti Panagkasangaymo Ita nga Aldaw]
[Ken ni Adelindes]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o8.2o14