Dua A Daniw

1.
Agtutunos pallayog dagiti sabong iti makasalibukag
A pul-oy ket tunggal balikas a maibalikas, mabungon
Iti rapsodia ti daniw, pagsalaen ti angin dagiti kayo--
Masapul kadi pay nga imdengak ti ilalabasna?

Ngem paggaayatko met a buybuyaen wenno kasao
Dagiti mayepyepyep a napudaw a rebulto iti parke
A saan a makatimek wenno makakita ta kayarigak
Alimbubuyog nga agkatangkatang, agbirbirok iti diro.
Kiddawek a malawagan ti nakusnaw a lagipko kenka
Ta agbibiagak iti panaas nga imbati ti di pay naglunit
A sugat; no masagid, mapespes ti nakana nga ut-ot.


2.
Denggem pitik ti nadagsen a limdo 'toy pusok--
Daytoy kadi a pait ti saem iti pakailiwak kenka?

Pumusay met ti ragsak iti naglukongan ti lima,
Ket bayat ti apagdarikmat a pannakisarang kaniak
Ni Patay iti patibulo, aniat' banagen dagiti agrupsa
A kataltalonan a nalikmut iti sipnget, napegpegges
Kadi nga angin ngem iti ut-ot a dumanon iti panunot?

Awan pagilasinan ti tagtagiurayek--dagiti maidaton
A sabong kadagiti didiosen, ti alingasaw ti kalgaw
Ti galangugong iti baybay, ti apaggilap nga ilalabas
Ti layap iti tangatang, wenno masiglot ti lamiis
Ti rabii; a banag koma nga ilulutuadmo iti lagipko...



DUA A DANIW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com