"Dumngeg kadagiti makaabbukay a kanta ti iloko a naputar ken nagaun iti kalikagum ti puso. Dagitoy ti naitalimeng iti kaunggan tapno maikkan anges ti sonata ti kalman ken maibinggas iti agdama a mamalukay iti irteng ti rikna. No maminsan, pitingenna ti kaunggan ket lukaisanna ti linabag ti kalman nangruna no mainaig ken ni Ayat. Agbalin met a nota ti tunggal anges ket sika a mismo ti mangtempla ti kuerdas ni Ayat iti kayatmo nga ayug tapno rummuar ti napimpintas a himno ken rima ti biag..."
Samiweng. Daniw. Sarita. Salaysay. Damdamag, Kdpy.
Nov 26, 2015
Ayat
Importante a paset iti kararua
ti ayat, ken amin a di makita-
isu laeng ti eternidad.
Isut' gapuna nga agtrabaho
dagiti agayan-ayat, ta no bilang
agsina ti bagi ken kararua,
mawayawayaan ti ipatpateg.
Mayarigak ti tangatang iti daya
sakbay a naipasngayak,
ti ipapatayko makita iti rugi ti law-ang
nga agpangato iti laud;
iturong ti dana no daytoy
ket agpadaya wenno agpalaud-
agpada a sika ti adda iti nagbaetan.
Ngem suotek ti payak no agpayakpak
daytoy ayat ket aramidek ida a napigsa,
lipatek ti kapanunotan dagiti relihioso;
ti ayatko adda iti pantok,
kadagiti aringgawis.
Ti rabii laonenna ti aldaw
ket ti taaw warakwaraken
ti dalluyon, ikawes ti tangatang
ti sagut nga itedtayo-
ta awan uray pay dagiti addaan
ti maysa a situasion ti sukog wenno aspeto,
problema, isyu nga addaan kainaigan a banag
a makapagtalinaed no aggunay ti rikna.
Ta agtamed ti bagik,
ti anges ken panagsaok isu ti pana-
kunak, dinak ilibak. Padasem.
Ayat
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
Subscribe to:
Post Comments (Atom)
No comments:
Post a Comment