O kararuak, napunnoanka kadin kaniak?
Pangngaasim ta saan. Saan koma pay.
Iti naminsan a naguldagak,
Kunak no nalamiisakon
A bangkay ta diak maikunail
Ti bagik, kasarsaritaka ti kunak
Ngem diak mayesngaw bosesko.
Mangngegko ti aglawlaw, ngem
Awan makangngeg iti timekko.
Awan makipagrikna ti ararawko-
Mariribukanak ta ipagarukon
No addaakon iti tanemko.
Mariribukanak no addaak
met la kenka wenno sika
Adda met la kaniak.
Naglamiis ti mariknak, ti aglawlawko...
'Yarigko ti bagik a kas maysa
Nga angin ket sika ti bulong.
Ta no dika magunggon,
Ania ti aramidem?
Nupay kasta Siak ti siak wenno sika
Ti sika, wenno sika para kaniak.
Kasta met a Siak ti siak, sika
Ket sika ken sika para kaniak.
Ngem kunam a natagtagainepnak
A maysaakon a bangkay.
Kayatam kadi a maisinaak kenka?
Lipatennak iti lagipmo? Nupay kasta,
Agyamanak ti pannakalagipmo kaniak
Iti tagtagainepmo ket namnamaek
Nga agtriplento pay tawen a danonek.
Mangbirokak kadi iti sabali nga ayaten
Malaksid kenka? Ay saan, pangngaasim!
Iti hardinmo ti pakasay-opak ti banglo
No sadino ket makitak ti puro rosas-
Gay-atek kadi nga iggaman dagiti siitna?
Saan!
MANGBIROKAK KADI ITI SABALI?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment