Ammok

Ammok a nakiredkayo
Ammok nga ismartekayo
Ammok a makitayo ti lubong
Iti bukod a maris ken lawag-

Ammok met nga umay
Ti pannakalagip, aldaw
A panagkasangay
Ngem kalpasanna, 
Agpukawda a kasla asuk.

No maminsan dagiti napateg
Iti biag, ammo ken gagayyem
Addada ti sibay kalpasanna,
Awandanton a makita-
Adda dagiti agbati,
Adda saan nga agbayag.

Ngem addaak nga agnanayon
Iti sibayyo tapno mapagtalinaed- 
Mapapigsa ken mapakired
Ti bagi ken panunotyo 
A mangsaranget ken makirupak
Kadagiti dumteng a pannubok;
Saanyo ketdi a palubosan
Nga abakennakayo ti kinabulas ti biag-
Ta addakayo iti lubong
A mangakem ti maysa a banag.

Naitaokayo tapno agragsak,

Agbiag!

Pasetkayo ti ramut
Tapno dumakkel ken agrampaya...


Naragsak a Panagkasangayyo, Kakabsat!


AMMOK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com