Dakayo ti kabsat
Ti anghel kaniak.
Napnokay' ti abilidad,
Kinasirib, kinasikap.
Sisasagana a mangsaranay,
Mangted ken tumulong
Iti oras ti pannakasapul.
Dakayo ti kangrunaan
A gayyem ket no adda man
Maysa nga awis a kalikagumak,
No kabaelak-itedko a supapak
Ti anus, dungngo ken panangipategyo.
Di malibak adda dagiti aldaw
Relasiontayo bilang agkakabsat
Tumaud susik, agbalin a nakiro;
Kas iti pananglangeb ti sipnget
Ti tangatang yegnat' nalidem
Nga aglawlaw, ngem saan
Nga agbayag ta dagus a mawaknitan-
Dakayo a mismo ti lawag
Ta diyo ipalubos nga agari
Ti di panagkikinnaawatan
Uray maysa laeng nga aldaw.
Kadagiti aldaw a pannakasubok
Ken pannakasuotko, addakayo latta
Iti sibayko tapno gabayandak, iyawatyo
Dagiti ima tapno didak babay-an.
Agyamanak kadakayo, dakayo a kabsat,
Dakayo ti anghel kaniak, mannakaawat
A gagayyemko iti rigat ken gin-awa
Saan pulos agmawmaw ken agngudo
Ti panangipategko ti panagkakabsat-
Naragsak a Pananglagip iti Aldaw ti Panagtao!
DAKAYO TI KABSAT [TI ANGHEL KANIAK]
[Kada Maria Corazon R. Magundayao nga agkasangay ita- Mayo 1,
ken Marlene R. Rivera nga agkasangay met no-Mayo 10, 2016]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment