Sika Latta

Mayo Uno gayamen...

ngem Sika latta daydi napusaksak
a sabong iti pusok ingget agadiwarat'
banglo; dawatek a dika koma 
manglaylay tapno sikanto latta ti Sika
nga inspirasion a mangbiag
kadagiti mabukel nga arapaap.

Sika ti naputar a daniw
a naitalimeng iti barukong.

Sika ti kanta,
ti daniw iti kanta,
ti pakabuklan ti daniw ken kanta.

Sikat' namagpitik ti pusok
ket ni kaano man saan a mapukaw
uray maysa a balikas a maibinggas
nga agaun kadagitoy bibig;

ta uray kunak a mamaliw ti panawen,
ta uray kunak a mamaliw maris pusaksakmo,
sika ket Sika latta
ti biag,
ti ayat;

ti ayat ken biag
tapno maymaysa ti arapaap...


SIKA LATTA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com