Dagiti Puted a Daniw: APUY ITI BARUKONG

Apaglabes ti alas siete iti rabii
idi sumangpet ni baket manipud
trabaho, dagus a nagsukat. Pinetpetak
ti nairut dagiti ramayna idi makaruar
iti kuarto. Impaluganko iti pick-up truck.


Un-unorenmin ti dalan nga agturong
iti King Kamehameha Golf Course
iti Waikapu a pangrabianmi ngem awan
timtimekmi, nagsinniim-nagsinnintir
no asino ti umuna nga aguni.


Narasay ti tao a nadanonmi iti disso
a tinurongmi, iti ruar ti pannaka-restauranna
ti pilimi a nagyanan. Napintas a buya
iti aglawlaw ta nalawag a makita ken matamdagan
dagiti aglabas a lugan iti baba ti lugar
a nagtugawanmi-- makita pay ti anaraar
ken kasla kundidit a silaw dagiti pagtaengan
iti sakaanan ti Bantay Haleakala.

Nalamiis ti apros ti angin nga aggapu
iti amianan, ngem nabarbara ti apuy
iti barukong a mangar-aron kadagiti riknami...



Dagiti Puted a Daniw: APUY ITI BARUKONG
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com