Samiweng. Daniw. Sarita. Salaysay. Damdamag, Kdpy.

Aug 3, 2018

Dua a Daniw



[i]
Kenka 
ti aglaplapunosan 
nga ayat nupay adayoka, addan 
bukodmo a lubong--awatek, saankan 
a makita, dikan maaprosan.

Ket uray aggunay 
amin a kontinente 
a nagtakderak tapno ibualna dagiti adigi
ti lubong a maisina kaniak,
adtoyak sikakapetak.

Maipalais 
panunotko iti lugar 
a diak masinunuo, agparang ti realidad, 
agrehistro dagiti saludsodtumpuar 
dagiti tubeng a mangitunda ti pagkapuyan 
ti bagi ngem diak mabuteng ti aniaman 
nga iparnuayna gapu iti wakwak 
ti dakes a panunot wenno lagip-
tengngelmo ti amin
a rekuerdo dagitoy a bahia.

O Ama, ti nasged a tarigagaymo 

ti kaimbagan a mangitag-ay ti pusok; 
ti panangsurot ti imbatim a tugotmo 
nga uray kalpasan dagiti naglabas 
a tawen a dikan makita a sibabagi,
maipallayog ti kararuak 
nga agpayakpak a mangasak 
iti dalan ti masakbayan--
ti pannarabaymo ti pigsak,
paksiatek duadua-panagamak.. 


[ii]
Dimo imbaga ti papanam
dika nagpakada, awankan 
idi naammuak nga inasakmo 
ti desdes a kaikariam.

Mailiwak met. Kailiwko
ti kaaddam koma. Binirokka
kadagiti naglabas a kalman
ta bareng kunak maitedna
ti sungbat ngem napaayak.
Kayarigak ti nagsapul
ti napukaw a dagum
iti kagaramian iti ayatko
a maaprosan-makitaka;
nakas-ang ti nagtungpalan.

No koma ayat ti makasalbar 
idi nagbugsotka, intedko kenka 
ti biag. Ti adda kaniak isu 
ti tanda ti ayat nga intedmo
met laeng. Iti kasta, saannaka 
a kinawit ti kumpay ni patay. 
Ngem saan kadi a kastoy
ti rueda ti biag? Adu a rason
ti di mailawlawag iti aglawlaw
gapu ngata ta Isu ti pagayatanna.
Ngem inayatka ti kasta unay
uray nabayagkan a naikanana.
Ayatenka latta. Silalagipak latta.
Isu ti mandar ti panunot.
Isu ti marikna ti pusok--
adda latta lugarmo kenkuana
nga awan asinnoman a mabalin 
a mangpunno ti pagkurangan

ti nagbaetan no di Sika.

Saanka a pimmanaw nga agmaymaysa.
Ti pasetko, nakipagaliwaksay met kenka
iti aldaw a nakipagtaengka Kenkuana...



DUA A DANIW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com

No comments: