Sinapulko

[Nabulod ti ladawan a naaramat]


Sinapulko ti langit
nga agpaay kaniak
tapno makainana
a natalinaay ti kararua,
ngem naatap ti gasat.

Awan dados.

Nakaar-arogante,
nakaam-ames
ti nagbalin a pagteng.
Kasla nagbuyaak iti pelikula:
ti naglabas, ti agdama 
ti main-inaw a ladawan 
ti masakbayan.

Nagbanag ketdi 
a pagkarnabalan
iti aglawlaw. Uray 
ti musika, saan 
a makaanay 
ken makalinglingay
a denggen. Nakitak 
ti arigna nisnis 
a daradara 
a pagan-anay 
nga aruat 
dagiti  pada a makidaya 
iti libre a sagut ti biag.

Nagdawatak ti kaasi
iti lubong, ngem patay
ti insubadna, 
nupay mamatiak
iti agdama,
saanak a bangkay. 

Ket ti apagapaman
nangngegko 
dagiti karasakas
ken arimpadek 
nga umas-asideg kaniak,
mariknak a kasla
mabbualak iti nagtakderak;

ngem diak inkankano
no di naguray iti sumaruno
a mapasamak.

Diak naggunay ta mariknak
a nagtaeng ti pammati kaniak.

Apo, ammok a dinak baybay-an.
Sapulenka no dika mauray-
ti pusok aywan ken adda
iti pannarabaymo...



SINAPULKO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com