[nabulod ti ladawan a naaramat] |
matmatak lang
dinak pawilan,
matmatak
ta diakon maibturan
awis sabong a nalasbang
baludna dagiti matak;
dika madanagan
awan pakaan-annuam
diak aprosan
matmatak lang
amangan maiggamak
siitna iti lawlaw--
masugatanak.
matmatmatak laeng
bareng kidmatannak met
agpaypayapay a petalo
say-opek
ayamuomnat' banglo.
dimo ipawil, ala,
a matmatak ti pintas
ti lumabbatis a rosas,
dagiti nagtagikorona
a sepalo a nanglikmut
ti sabong a kababangloan--
ta uray diak maaprosan,
mariknak barat' angsaw
a maidingpil iti rupak
ti ingungotem a kinabaknang!
matmatak lang
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com
No comments:
Post a Comment