Samiweng. Daniw. Sarita. Salaysay. Damdamag, Kdpy.

Mar 4, 2019

No Koma Laeng

[bukod nga ala a ladawan



Aniat' maganab a gunguna
iti yuumay ken ipapanko?

Sadino ti 'yan ti panait 
a pakuros ti pagabel 
iti lagisi a pagbiagko?

Iti sirkulo ti espera ti biag, 
adu dagiti naimbag a tao; 
ngem mapuoranda 
ken agbalin a dapo--
ngem sadino ti 'yan ti asuk?

Maited kadi lattan ti kaasi 
tapno mayarigak iti kimriit 
a prutas, maguped puonko
babaen iti kumpay ni patay

ah, ti asi, leddaang, panagkurap
ti mata, kinaderrep-kinarugso 
ti lasag, madalusan kadi ngarud
a mamimpinsan ti rugit?

Nupay sitatanang a tinagikuanak 
piman a panagbiag, naramanak 
met apagapaman 
sam-it dagiti balikas 
nga inyula ti lubong, 
ngem nagngudo ti relasion 
nga isu ti innak ipapanaw, 
isisina--kasla ang-angaw 
ti tagtagainep 
iti amin a panagbiagko.

Ngem no koma laeng 
agbati ti nagan ti ragsak
a kalikagumak, siasino
ti makaanus kaniak
nga agragsak nga agmaymaysa;
ti kadi naamnaw nga arak?

Ngem ammok nga agtalinaed
nga iggem ti nairut a dakulap 
ti sangabaso nga arak 
tapno awan siasino
a manginum iti daytoy.

No koma laeng adda okasion
nga agserbi kadagiti mannurog,
no laeng adda pagpatinggaan
daytoy atiddog, nawasnay
a dalan ken pagdaliasatan
ti ginasgasut-rinibu a tawen,
awan mabalinan ti pusok
a mangtubngar no di agbanag
a tapok dagiti nailasaganen 
a namnamak-- ngem kabaelak
ti agruting kas iti kayo, agsubual 
manen kadagiti berde a minuyongan
no la ketdi ilalaak nakaparsuaan
nga inted ti lubong.

Gapu ta matagikuak amin
daytoy a lugar nga addaan
iti dua a ridaw-- ti biag ken patay;
ti pusok laeng ti agleddaang
iti panangisukona ti kararuak
a saan man pulos makarikna
ti ragsak bayat panagbiagko
iti lubong, ngem ammok 
nga addaak iti salinong ti kappia
iti inak a nangipasngay kaniak...



NO KOMA LAENG
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com



No comments: