Arig Musika Kaawanmo Iti Aldaw Dagiti Amma

Arig musika kaawanmo iti aldaw dagiti amma
Ulimek agari iti distansia a nagbaetan,
Agbebessagak diak mailadawan rikna
Nairut panangpetpet kaniak ti ir-iruken

Denggek amin iti labes ti di-kabaelan
A mangngeg, dika makita ngem addaka
Laeng asidegko. "Agrag-o!" kunam,
Nagtung-edak ngem diak maikuti ti bagi
Nagmattiderak a makibuyog iti tudo

Wen, adda ragsak kaaddam manen kaniak
Mariknak aprosmo, addaak iti takiagmo
Rapsodia ti musika nga adda iti lawlawko
Adda talged ta nawayaak a mangipeksa

Nagpintasen ken naglaplapunosan
Ta magungongak pay a maayatan
Ngem nagpalikudka a kas iti mausika
Nga in-inut a kimmapsut,
Di mangngegan-- limmidem isemmo
A nagtakder iti kasumbangir a patag

"Pangangaasim!" kunak, diak ammo
Ti sawek ta nagpukawkan iti imatangko.
Dimtengen ti aldaw nga ipapanmo
Ket nariknak ti panagbuteng gapu ta
Ti ragsak nga imbatim kaniak--
Leddaang nga an-anug-ogak...
.
.
.
ARIG MUSIKA KAAWANMO ITI ALDAW DAGITI AMMA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com