Panagdaliasat

[Nabulod ti ladawan a naaramat]

Naguldagak iti nayaplag a karuotan 
inkidem ti mata bayat nga umagibas 
pul-oy ti angin tapno aprosannak--
malamiisanak; nabannogak unayen 
nga agdaliasat iti nadaeg a lugar.

Kalpasan pannakaigaga ti tapok 
a kalsada, nakaay-ayat a tinaliawko't 
likudak, nakaangesak ti nalukay; 
ket ti panagpanaypanay dagiti imak 
bayat panangulodko ti saka a magna, 
mariknak ti kappia iti labes ti abaga.

Daytoy panagdaliasatko, agbebessagak 
a naguldag--nainanaanak apagapaman,
nagabanseak, inunorko ti desdes.

Nagriaw ti pusa, timmayab 
dagiti billit a malabsak iti pagnaak

Iti atiddog nga aldaw ken dagiti natapok 
a kalsada amin agunida kas iti tukak ken wak. 
Mayablat nanumo a puot a mangriing 
ken agsangit a mangiladawan ti sipnget.
Awan maibalikasko a sungbat. 
Ti laeng pusok ti makasungbat.

Magagaran dagiti lanut nga agkalatkat 
kadagiti kayo ken aguray; ket ti panaglabbasit 
ti kayo ti mansanas, nagsarimaddengda a nagsala; 
tumaliawda iti likud kas da la agpukaw nga agawis 
dagiti sukog-rupa a rosas, ngem ti laeng pusok,
ti laeng pusok ti makaawat ken simmungbat.

Nupay mariknak a natalged ti dana 
a taltalaytayek iti atiddog nga aldaw,
dapandapanak ket masinitak iti pudot 
a kaarig ti maysa a natay 
nga agkulkulimbitin iti namaga a tapok.

Ngem iti adayo, adayo a napnoan madanon 
a makita ti mata, ken atiddog, wen, atiddog 
ti pannakapnek ti sikikita a mata iti papanak.
Kukuak ti lubong: asul a turod, pirak a lago,
nalawa a kataltalonan, dagiti sabong
ken dagiti atitiddog a kalsada, 
hardin nga awanan ti ruangan
ken nakalukat a parparaangan--

Daytoy ti desdes a suroten 
dagiti sakak, tenglento ida ti pusok 
no magtengkot' dana a pagnguddoan.



PANAGDALIASAT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o8.2o11