Esensia

[Nabulod ti ladawan a naaramat ken ni Lydia Velasco]

Daytoy babai, ay-ayatek.
Ay-ayatennak, ipatpategko.
Ngem pagammuam nagparang
iti nagbaetanmi ti maysa a karibal
a nangted nakiro a situasion.

Naranggas nga agkiddaw,
kayatna a tagikuaen amin
uray ti kawaw nga appan--

Dayta ni Esensia, umipus-ipus
uray sadino ti papanak, agsiim
a kas maysa a sikyu, inyegnat'
pakaburiboran ti ay-ayatek.

Impanaw ni Esensia ti ay-ayatek.
Impanna kadagiti kabakiran,
kadagiti sirok ti kayo, iti lago,
kadagiti nadaeg a sisiudad
ken insaadna kenkuana ti trono 
dagiti manglimlimo a landok.

Pinukkawak ni Esensia babaen
ti timek ti sirib ken kanta ti sursuro--
Saanak a nangngeg, kinayawanna
ti ay-ayatek nga agnaed iti selda
ti kinamanagbubukod, no sadino,
dagiti gamrud ti agtagikua ken agtaeng...

Sinapulko ti ay-ayatek kadagiti bakir
ken kataltalonan, ngem awan masapulak.
Imbalud ketdi ni Esensia ti ay-ayatek
iti yuyeng ti kueba ti kinabukatot
ken kinadurbab, sadiay naikandado
ti kasta unay a saem ken leddaang
iti kawar ti gangandiong a balitok.


No agmulagat ti nakaparsuaan,
awagak manen ngem saannak
a mangngeg, ket aggaarimutong
dagiti kalub ti matana iti pannakairidep.

Ket bayat ti panagari ti ulimek 
ken pannakairidep dagiti sabong,
inallilawko manen ni Esensia ngem awan
sungbatna ta maamak iti mabalin
nga iyeg ti bukodna nga aramid--
ti panagparang ti aniniwanna iti panunotna.

Inyikkis ni Esensia ti panagayatna kaniak;
dinamagna no bukodko nga aramid
ti panagayatko iti ay-ayatek, diak nagtimek.
Ngem mabirokannak a saan nga ilaksid
ti aramid ti Dios. Sinapulnak kadagiti pasdek
ti gloria a binangonna babaen dagiti tulang
ti sabali; inyarasaasna iti lapayagko iti baet
dagiti sangagabsuon a balitok ken pirakna,
ngem insapatak a mabirokannakto laeng
iti lugar ti kinasimple a pagtaengan--
ti binangon ti Dios manipud iti ubbog ti ayatna.

Gandatennak nga agkan iti sango ti baul
ti kuartana, ngem saan a dimmanon ti bibigna,
malaksid ti nalamiis a palayupoy ti angin.

Dinamagna no kayatko ti makibagi 
iti aglaplapunosan a kinabaknang, ngem diak
panawan ti Dios ket diakto iwalin ti kapa
ti kinapintas ti biag. Impamusposanna a sinapul
ti panangallilaw; ngem nabirokak laeng 
ti pirgis a paset ti pusona. Nadarummiadan
ti puso kadagiti babassit a selula, ngem 
inagasak ken tinaraonak babaen ti ayatko.

Nasursuro ti ay-ayatek ti nanglabsing
ti pagayatan ken panangbalud kenkuana
ni Esensia-- ket sursuroakto no kasano
nga abbungan ti lua iti ayat tapno 
ammuenna a saan la a dagiti material
a banag ti mabalinmi a pagbiagan a dua.

O, babai, ti ay-ayatek;
siak ti kasilpom, ti biagmo.



ESENSIA 
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o8.2o11