Angep

[Nabulod ti ladawan a naaramat]


Nakariingak. Diak ammo no kasanot'
kapaut pannakairidepko. Bimmangonak.
Awan tao a makitak iti balay. Awan ti inak,
awan pay ti amak ngem nabaybay-an 
a nakalukat ti ridaw-- naangep iti labes ti tawa,
iti uneg ti kuarto ken uray pay iti lamisaan
a panganan. Rimmuarak, tinurongko
ti hardin ket inlukatko ti pagserkan, nagpukaw
ti nagtakderak a balay. Inalun-on ti daga...

Naangep iti aglawlaw. Kaslaak nagtagtagainep.
Pagammuam nakatakderak iti maysa nga isla,
mariknak nga agtatapawak iti rabaw ti angep.
Naibarikes iti bagik a kas man aglaylayagak.

Ngem baliktad dagiti pasamak, nagtayab
ti isla nga adda iti babaen dagiti sakak.
Diak mayaddang, diak maikunail wenno
makataray. Nasarakak laengen ti nagango
a kayo. Nagbatay iti sanga ti nabasa a billit,
matmaturog iti nasukog nga umok.

Naglayagak ket ipagarupko no maysaak
a kararua. Nasarakak ti maysa a balay.
Langanat' nabaybay-an ta awan
arimekmekna iti uneg. Ngem nakitak nga adda
matmaturog a nagkaatag--maysa a lalaki,
maysa a babai. Awan ragsak a naipinta
kadagiti rupa no di leddaang ti marikna iti asugda.

Naiturongak a naisubli iti nagappuak, ti balay
a saanen nga isut' pagtaengak. Pagammuam
ta nakariingak. Nagsubli ti ganaygay, ti puot,
ti nakemko. Nasdaawak, addan sabali
a tao iti uneg-- maysa a lalaki, ngem
saan nga isut' amak; maysa a babai
a saan met nga isu ti inak. Naglukat ti ridaw,
naangep iti tawa, iti kuarto, iti lamisaan
kas ti puraw nga asuk iti panagbettak
ti bomba, nabasa iti aglawlaw a kas kaadu
ti naibuyat a dara manipud sugat. Rinamanak,
sumam-it a naapgad sa pumait. 

Nakitak a naikuadro ti angep ti kabakiran
iti panagbannawag, timpuar ti nalabaga 
a taaw. Imbalunetko ti ridaw. Nagsardeng 
panagpitik ti pagorasan ti kasam-itan 
a pannakairidepna iti isisingising ti init iti daya.

Nariingak manen. Diak ammo no pudno
a nakaturogak. No kasanot' kapaut
ti pannakairidepko, ngem ammok
nga agang-angesak. Nadlawko nga adda
nagna iti likudan ti pader, nangngegko
nga agngerngernger ti apuy iti dalikan.
Agkedkeden nga agtrabaho ti pagorasan.
Liknuktak ti ridaw ngem rupak ti nakitak, 
adayo ken diak mamira ti bigat a pagsarmingan.

Kalpasan ti atiddog a diak maawatan 
a pannakairidep, no pudno man, mariknak
tedted nabara a ling-et manipud iti atep.
Nariknak yaasideg ti maysa a banag:
nabisngay ti angep iti dua
ket isun ti naudi a nakitak. 



ANGEP
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o1.2o12