Agingga

[nabulod laeng ti ladawan a naaramat]


Agingga a makitak dagiti
pinuon ti kayo, siak laeng
ti agtagikua kadakuada

Agingga a maay-ayoak a denggen
ti ringgor dagiti tumatayab,
siak ti agtagikua ti kanta a kankantaenda

Agingga nga adda ruot ken tambak
a pagaksawak, siak ti agtagikua
kadagiti kataltalonan

Agingga nga addaka 
iti sibayko, siak laeng
ti agtagikua ti ayat

Agingga a napigsa pay dagiti ima
nga agbannog, siak 
ti agtagikua kadagitoy tinapay

Agingga a nakalukat dagiti ridaw
ken tawa, siak ti agtagikua
iti pagtaengan a sangbayak

Ket agingga a mariknak
a mabaddekak ti daga, sisiakto laeng
ti agtagikua kadagiti tugotko...



AGINGGA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.o2.2o12.maui