Dika Koma Lattan Aguray

[nabulod laeng ti ladawan a naaramat]

Panawenen tapno maitanem daytoy nga edad
A nakaipempenan ti wara ti libro iti sangatawen.
Dagiti ngipen makumikom iti patapuak ti tawa

Iti panangkirab ti saringit ti napatangken a longboy.
Napudaw ti maris nga agtubbog iti karabukob-
Kasanot' imbag nga ipaay ti saan a mamati iti langit?

Agpaggaak ti rima iti uneg ti sangagabsuon a rugit,
Makatitileng iti lapayag ta per-akenda dagiti kari
Ket dagiti nagan purosenna ti amin a porma ti kinaulbod

Iti alinsaed ti uni ti danum a makinkinog iti agmalmalem.
Kasanot' imbag nga ipaay ti ipupusay iti panangtallikud
Ti tanem a naisangrat kenka gapu't panagngatangata?

Awan pagparammag, awan panagbabawi a karaman
Dagiti darepdep a mangtengngel ti awan bidibidan wenno appan-
Ket uray ania a situasion, madigoskanto latta iti bato!

DIKA KOMA LATTAN AGURAY

[Iti Maysa a Pagayam]

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

www.samiwengkenayatnirudy.blogspot.com

[CR]RRR.02.06.2012.maui