Maris ti Rabii

[Nabulod ti ladawan a naaramat]


Agpukaw dagiti maris ti rabii
Ket ti pintor ti daytoy nga aldaw,
Aginana; nasiglat paraisagana
Ti borador iti 'yaay ti sipnget kasandi
Ti panagaramatna iti nangisit a tinta.

Uray no kasta, ti laeng law-ang
Ti agandap ti marisna iti rabaw
Dagiti nabengbeng ken nakudrep
Nga asul tersiopelo; kas da la grano
Ti naranghita nga amarillo ti nakurap
A bituen, ket ti nalinak a dan-aw
Iti baba makita dagiti babassit
A panaganninawda: nakakuskusnaw,
Agnasanas ti pinta a masinasina
Apaman nga agdisso ti tedted
A mailaok iti danum--

Ket ti rabii kas ti paleta a pagikamboran
Kadagiti dekolor a pinta, isut' gapuna
Ti matak sikikita iti manamnama
A lugar a pagtaudan ti lawag ti init.



MARIS TI RABII
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
*cr.march.2o12.maui