No Siak Ti Pumusay

[nabulod laeng ti ladawan a naaramat iti daniw]

NO SIAK TI PUMUSAY
ni Rudy Ram. Rumbaoa
[nasurat.3.23.2012/maui]

Ket no siak ti pumusay,
Masapul a maitanemak
Awan koma ti kamposanto
A manglikmut kaniak-
Ta awan ti agmaymaysa iti bassit 
A kueba iti panagdalagudog
Ti nakapegpegges a panagpitik ti puso.

Kasano nga ikanawa ti agkumbawa
A puso ti agbabasa a kalub dagiti mata?

Mabayadan ti maudi nga utang
Ti nalaus unay a panagleddaang,
Ket ti panagdaliasat a sumuknal
Iti sagrado a disso-
No daytoy man ti gasatko,
Kaykayatkot' maimansayag iti lugar
A pakangngegan ti ringgor ken di pannakaidna
Ti panaggutokgutok ti amin a tao
Gapu kaniak.

Bay-an nga agpuligos
Ti ligay iti amin a suli
Ken nagtagilanga a lubong-
Ti ragsak, komersio, ayat
Ken ti insiwet a panagtaray dagiti saka
Nga agabanse iti rabaw ti ulok.

Uray iti tanemko,
Siakto laeng ti kakaisuna 
A makarikna iti disintonado
A ritmiko ti sarado a panagkakabagian,

Panaggagayyem ken uray pay ti pamilia.
Ket iti rabaw ti lubong ti nakana unay
A kinaulimek a mangtutuok kaniak-
Ipupusay...

-Dagiti Koleksion a Daniw, Sarita, Kanta, ken Dadduma Pay

[copyright.2012.by.rudy.ram.rumbaoa]