Bay-am A Mangputarak Iti Kanta

[Nabulod laeng ti ladawan a naaramat iti daniw]

Bay-am A Mangputarak Iti Kanta
Ni Rudy Ram. Rumbaoa
[nasurat.5.21.2007.maui]

Bay-am a mangputarak iti kanta
  kanta a kansion ti biag
  biag, ray-aw ken ragsak
  ragsak ti puso, samiweng kaunggan;

Samiweng kaunggan daytoy a kansion
  kansion ni ayat, aronak ken rubrobak
  wen, aronak ken rubrobak iti nasged
  nasged a tarigagay tapno tunggal nota ken balikas
  yegnat' ayug a kasam-itan;

Ayug a kasam-itan inka imdengan
  imdengam tunggal balikas ti kanta
  kanta a mangduayyat' rikna ken kapanunotan
  yegnat' kinatalged ken gin-awa;

Kinatalged ken gin-awa ti iburay 'toy maputar
  maputar ti makaabbukay a samiweng
  samiweng a kakibin ti saning-i
  saning-i ken areng-eng 'toy kutibeng.

Bay-am nga aglippias ta pusom
  pusom iti naumbi a dayyeng
  dayyeng a mangruros ti sumangbay
  sumangbay iti apagapaman a salemsem;

Ita a rabii, bay-am a mailibayka
  mailibayka iti musika a kanta ti ayat
  ayat a napnoan dungngo iti pannaturogmo
  iti pannaturogmo agparangak darepdepmo
  iti darepdepmo, sadiay kompasanta nga isala
  isala ti maputar a kanta:

Bay-am ngarud a mangputarak iti kanta
  kanta a kansion ti biag
  biag, ray-aw ken ragsak
  ragsak iti puso a mangyeg namnama!

[C]rudy.ram.rumbaoa.2007]